ٹائم میگزین نے حال ہی میں مختلف شعبوں سے تعلق رکھنے والے دنیا کے 100 بااثر ترین افراد کی سالانہ فہرست جاری کی ہے جن میں نیویارک کے میئر ظہران ممدانی بھی شامل ہیں۔
یہ بھی پڑھیں: ٹائم میگزین نے بالی ووڈ اداکار رنبیر کپور کو 100 بااثر ترین شخصیات میں شامل کرلیا
یہ فہرست ان 100 فنکاروں، رہنماؤں، موجدوں، آئیکونز اور دیگر بااثر شخصیات کو خراج تحسین پیش کرتی ہے جنہیں میگزین کے ایڈیٹرز دنیا کی سب سے مؤثر شخصیات سمجھتے ہیں۔
فنکاروں کے زمرے میں جینی کے علاوہ اداکارہ کیکے پالمر، ٹی وی شو ’دی پِٹ‘ کے نوح وائل، ایرانی فلم ساز جعفر پناہی، بینیسیو ڈیل ٹورو اور رنبیر کپور سمیت دیگر شخصیات شامل ہیں۔
جعفر پناہی کے حوالے سے لکھا گیا کہ وہ سنسرشپ کو تخلیقی مزاحمت میں بدلنے کے لیے جانے جاتے ہیں اور ایران کی حقیقت کو اپنی فلموں کے ذریعے دنیا کے سامنے لاتے رہے ہیں۔ ان کا ایک قول بھی شامل کیا گیا کہ ’میں ایک سال کے لیے جیل جاؤں گا اور ایک نئی اسکرپٹ کے ساتھ واپس آؤں گا‘۔
اداکاروں میں بالی ووڈ کے رنبیر کپور بھی شامل ہیں جبکہ پایونیرز کی فہرست میں یوٹیوب اسٹار مسٹر بیسٹ کا نام ہے۔
ٹائٹنز کے زمرے میں اداکار بین اسٹلر اور زوئی سالڈانا، ماڈل انوک یائی، ڈیزائنر رالف لارین، مائیکروسافٹ کے سندر پچائی اور عالمی ادارہ صحت کے عہدیداران پریشس ماتسوسو اور این کلئیر ایمپرو سمیت کئی دیگر شامل ہیں۔
مزید پڑھیے: پاکستان کی نوجوان ماہر قانون ماہ نور عمر ٹائم میگزین کی ‘ویمن آف دی ایئر’ فہرست میں شامل
آئیکونز کی فہرست میں ہالی ووڈ ستارے کیٹ ہڈسن، ہیلری ڈف اور ایتھن ہاک شامل ہیں جبکہ اولمپک گولڈ میڈلسٹ الیسا لیو اور وکٹوریہ بیکہم بھی اس فہرست کا حصہ ہیں۔
ہیلری ڈف کے بارے میں نکول رچی نے لکھا کہ وہ ’وہ لڑکی تھیں جن کے ساتھ ہم اپنے کمروں میں ڈانس کرتے تھے اور آج وہ ایسی خاتون ہیں جن کے ساتھ ہر کوئی ڈنر کرنا چاہتا ہے‘۔
لیڈرز کی فہرست کا آغاز پوپ لیو چہاردہم سے ہوتا ہے جس میں میکسیکو کی صدر کلاڈیا شین باؤم، امریکی وزیر خارجہ مارکو روبیو، امریکی صدر ڈونلڈ ٹرمپ، نیویارک کے میئر ممدانی، چین کے صدر شی جن پنگ، اسرائیل کے وزیر اعظم بنیامین نیتن یاہو، اسٹیو وٹکوف اور نیپال کے وزیر اعظم بالین شاہ شامل ہیں۔
مزید پڑھیں: نیویارک میئر کے لیے امیدوار ظہران ممدانی اور امریکی صدر ٹرمپ آمنے سامنے
انوویٹرز کی فہرست میں امریکی ویمنز اولمپک ہاکی ٹیم کی ہیلری نائٹ، شیف وکاس کھنہ اور فارمولا ون ڈرائیور لینڈو نورس سمیت دیگر افراد شامل ہیں۔
