ملک بھر سے جاری حج 2026 کے فضائی آپریشن میں تیزی آ گئی ہے اور سرکاری عازمین حج کی روانگی کا سلسلہ مسلسل جاری ہے۔ ترجمان وزارت مذہبی امور کے مطابق اب تک 21 پروازوں کے ذریعے 5 ہزار 250 سرکاری عازمین حج مدینہ منورہ پہنچ چکے ہیں۔
ترجمان کے مطابق آج منگل کے روز مزید 13 حج پروازوں کے ذریعے 3 ہزار 510 عازمین حج سعودی عرب روانہ ہوں گے۔ مختلف شہروں سے روانہ ہونے والی پروازوں میں اسلام آباد سے 4 پروازیں شامل ہیں، جبکہ کراچی، لاہور، ملتان اور کوئٹہ سے 2، 2 پروازیں روانہ کی جائیں گی۔ اس کے علاوہ سیالکوٹ سے ایک حج پرواز بھی عازمین کو لے کر روانہ ہوگی۔
یہ بھی پڑھیے: پاکستان سے حج پروازوں کا سلسلہ جاری، 2 ہزار 687 عازمین مدینہ منورہ پہنچ گئے
وزارت مذہبی امور کے مطابق سرکاری عازمین حج کے فضائی آپریشن میں قومی ایئرلائن پی آئی اے کے ساتھ سعودی ایئرلائن، ایئر بلیو اور ایئر سیال بھی حصہ لے رہی ہیں تاکہ عازمین کو بروقت اور سہولت کے ساتھ سعودی عرب پہنچایا جا سکے۔
ملک بھر میں قائم 10 حاجی کیمپوں کے ذریعے عازمین حج کی مرحلہ وار تربیت، سفری دستاویزات کی فراہمی اور ویکسینیشن کا عمل بھی جاری ہے۔ حکام کے مطابق تمام انتظامات کو مؤثر بنانے کے لیے خصوصی اقدامات کیے گئے ہیں۔
یہ بھی پڑھیے: مدینہ منورہ میں قبل از حج پروازوں کا آغاز، 1357 پاکستانی عازمین کی آمد
عازمین حج کی رہنمائی اور معاونت کے لیے پاکستان اور سعودی عرب کے ایئرپورٹس پر وزارت مذہبی امور کا عملہ 24 گھنٹے تعینات ہے، جو حاجیوں کو سفری مراحل میں مکمل سہولت فراہم کر رہا ہے۔
ترجمان کے مطابق حج فلائٹ آپریشن 31 مئی تک بلا تعطل جاری رہے گا، جبکہ آئندہ دنوں میں مزید ہزاروں عازمین حج مقدس سرزمین روانہ ہوں گے۔
