اپنا کھیت اپنا روزگار اسکیم کا آغاز، ہزاروں افراد مستفید ہوں گے، عظمیٰ بخاری

وزیر اطلاعات پنجاب عظمیٰ بخاری نے کہا ہے کہ پنجاب حکومت نے بے روزگار افراد کے لیے اپنا کھیت اپنا روزگار اسکیم کا باقاعدہ آغاز کر دیا ہے، جس سے ہزاروں افراد مستفید ہوں گے۔

مزید پڑھیں: صوبائی وزیر اطلاعات عظمیٰ بخاری کی جعلی ویڈیو وائرل کرنے کا مقدمہ، فلک جاوید کی ضمانت منظور

انہوں نے کہا کہ حکومت اس سے قبل اپنی چھت اپنا گھر اور بے گھر افراد میں مفت پلاٹس تقسیم کر چکی ہے، جبکہ نئی اسکیم کے تحت بے زمین دیہاتیوں کو زرعی اراضی فراہم کی جا رہی ہے۔

عظمیٰ بخاری کے مطابق اس منصوبے کے تحت حکومت زمین کے ساتھ 50 ہزار سے اڑھائی لاکھ روپے تک کی گرانٹ بھی دے گی، جبکہ مجموعی طور پر 160 ارب روپے مالیت کی اراضی تقسیم کی جا رہی ہے، جو صرف کاشتکاری کے لیے استعمال ہوگی۔

انہوں نے کہا کہ وزیراعلیٰ مریم نواز کی قیادت میں یہ فلیگ شپ پروگرام پنجاب میں زرعی انقلاب لائے گا، اور کسانوں کے لیے مختلف سہولیات جیسے کسان کارڈ، گرین ٹریکٹر اور ٹیوب ویل کی سولرائزیشن پہلے ہی فراہم کی جا چکی ہیں۔

مزید پڑھیں: جرمانے کا فیصلہ پی سی بی کا ہے تاہم کرکٹر نسیم شاہ کو ٹاؤٹ اور ٹرول نہیں بننا چاہیے، عظمیٰ بخاری

ان کا کہنا تھا کہ مریم نواز عملی اقدامات پر یقین رکھتی ہیں اور زراعت کا شعبہ ان کی اولین ترجیح ہے، جس کے باعث پنجاب میں گندم کی ریکارڈ پیداوار حاصل ہوئی ہے۔