امریکا کے وزیر خارجہ مارکو روبیو رواں ہفتے اٹلی کا دورہ کریں گے جہاں ان کی پوپ لیو سے ملاقات متوقع ہے۔ ویٹیکن ذرائع کے مطابق یہ ملاقات جمعرات کو ہوگی اور قریباً ایک سال میں کسی امریکی کابینہ رکن کی پوپ سے پہلی بالمشافہ ملاقات ہوگی۔
مزید پڑھیں:قطر پر اسرائیلی حملہ، امریکی سیکرٹری خارجہ مارکو روبیو اسرائیل پہنچ گئے
ذرائع کے مطابق مارکو روبیو اس سے قبل مئی 2025 میں نائب صدر جے ڈی وینس کے ہمراہ پوپ لیو سے ملاقات کر چکے ہیں۔ اس دورے کے دوران وہ ویٹیکن کے سیکریٹری آف اسٹیٹ پیٹرو پیرولن اور اٹلی کے وزیر خارجہ انتونیو تاجانی سے بھی ملاقات کریں گے۔
اطالوی ذرائع کا کہنا ہے کہ مارکو روبیو نے اٹلی کی وزیر اعظم جورجیا میلونی سے بھی ملاقات کی درخواست کی ہے، جو سابق امریکی صدر ڈونلڈ ٹرمپ کی قریبی اتحادی سمجھی جاتی ہیں۔
یہ ملاقات ایک ایسے وقت میں ہو رہی ہے جب پوپ لیو اور ڈونلڈ ٹرمپ کے درمیان حالیہ ہفتوں میں سخت بیانات کا تبادلہ ہوا ہے۔ پوپ لیو نے امریکا اور اسرائیل کی قیادت میں ایران کے خلاف جنگ پر تنقید کرتے ہوئے اسے ناقابل قبول قرار دیا اور امن کی اپیل کی۔
دوسری جانب ڈونلڈ ٹرمپ نے سوشل میڈیا پر پوپ لیو کو تنقید کا نشانہ بناتے ہوئے ان کی پالیسیوں کو کمزور قرار دیا۔ یہ بیان بازی اس وقت سامنے آئی جب پوپ لیو افریقہ کے 4 ملکی دورے پر تھے۔
اطالوی میڈیا کے مطابق مارکو روبیو کا یہ دورہ دونوں فریقین کے درمیان تعلقات میں کشیدگی کم کرنے کی کوشش قرار دیا جا رہا ہے۔ واضح رہے کہ پوپ لیو جمعہ کو بطور روحانی پیشوا اپنے ایک سال مکمل ہونے کی تقریب منائیں گے، وہ 8 مئی 2025 کو اس منصب پر فائز ہوئے تھے۔ا
