بھارت میں ریلوے کے انتظار کی فہرست کا بحران مزید سنگین ہو گیا، جہاں مالی سال 2025-26 کے دوران 3 کروڑ 39 لاکھ سے زائد مسافر کنفرم ٹکٹ نہ ملنے کے باعث سفر نہ کر سکے۔
یہ بھی پڑھیں:بھارتی ٹرین میں ملنے والا کھانا مسافر خاتون کے لیے بدترین الرجی کا باعث بن گیا
بھارتی میڈیا رپورٹس کے مطابق ریلوے سے حاصل کردہ آر ٹی آئی دستاویزات میں انکشاف ہوا ہے کہ ویٹنگ لسٹ پر موجود لاکھوں ٹکٹ چارٹ کی تیاری کے وقت خودکار طور پر منسوخ ہو گئے، جس کے باعث روزانہ ہزاروں مسافر سفر سے محروم رہے۔
رپورٹ کے مطابق اوسطاً روزانہ تقریباً 92 ہزار سے زائد افراد کنفرم نشست نہ ملنے کی وجہ سے ٹرین میں سفر نہ کر سکے، جبکہ ہر گھنٹے میں تقریباً 3 ہزار 870 اور ہر منٹ میں 64 مسافر متاثر ہوئے۔
بھارتی میڈیا کے مطابق سب سے زیادہ متاثر ہونے والے مسافروں میں سلیپر کلاس کے مسافر شامل ہیں، جن کی تعداد ایک کروڑ 68 لاکھ سے تجاوز کر گئی۔ رپورٹ میں کہا گیا ہے کہ اس بحران کا سب سے زیادہ بوجھ مزدور طبقے، طلبہ، کم آمدن والے خاندانوں اور چھوٹے شہروں کے شہریوں پر پڑا۔
یہ بھی پڑھیں:بھارتی ریاست آسام میں ٹرین کی ٹکر سے 7 ہاتھی ہلاک
اعداد و شمار کے مطابق گزشتہ چند برسوں میں یہ بحران مسلسل بڑھ رہا ہے۔ 2021-22 میں ایک کروڑ 65 لاکھ افراد سفر سے محروم ہوئے تھے، جبکہ اب یہ تعداد بڑھ کر 3 کروڑ 39 لاکھ تک پہنچ گئی ہے۔
آر ٹی آئی کارکن چندر شیکھر گور نے بھارتی ریلوے نظام پر تنقید کرتے ہوئے کہا کہ آزادی کے کئی دہائیاں گزرنے کے باوجود کنفرم ٹکٹ حاصل کرنا اب بھی قسمت کا کھیل بنا ہوا ہے۔ انہوں نے کہا کہ جدید منصوبوں اور دعوؤں کے باوجود بنیادی سفری سہولتیں عوام کو فراہم نہیں کی جا رہیں۔
