محکمہ موسمیات نے پیشگوئی کی ہے کہ مغربی ہواؤں کا نیا سلسلہ 18 مئی کی شب ملک کے شمال مغربی علاقوں میں داخل ہوا جو 23 مئی تک بالائی علاقوں پر اثرانداز رہے گا۔ اس دوران خیبرپختونخوا، پنجاب، اسلام آباد، گلگت بلتستان اور کشمیر کے مختلف علاقوں میں گرد آلود ہواؤں، گرج چمک کے ساتھ بارش اور بعض مقامات پر ژالہ باری کا امکان ہے۔
مزید پڑھیں:29 اپریل سے 3 مئی تک ہیٹ ویو کا خدشہ، محکمہ موسمیات نے الرٹ جاری کردیا
محکمہ موسمیات کے مطابق چترال، سوات، کالام، شانگلہ، مانسہرہ، ایبٹ آباد، پشاور، بنوں، وزیرستان سمیت خیبرپختونخوا کے متعدد اضلاع جبکہ مری، گلیات، اسلام آباد، راولپنڈی، اٹک، چکوال، لاہور، فیصل آباد، سیالکوٹ اور نارووال سمیت پنجاب کے مختلف علاقوں میں بارش متوقع ہے۔
اسی طرح گلگت بلتستان کے استور، اسکردو، ہنزہ اور گلگت جبکہ آزاد کشمیر کے مظفرآباد، نیلم ویلی، باغ، پونچھ اور میرپور سمیت مختلف علاقوں میں بھی وقفے وقفے سے بارش کا امکان ظاہر کیا گیا ہے۔
محکمہ موسمیات نے خبردار کیا ہے کہ تیز ہوائیں اور آسمانی بجلی کمزور تعمیرات، بجلی کے کھمبوں، اشتہاری بورڈز اور سولر پینلز کو نقصان پہنچا سکتی ہیں، جبکہ بالائی علاقوں میں لینڈ سلائیڈنگ کا خدشہ بھی موجود ہے۔
مزید پڑھیں: تیز ہوائیں، ژالہ باری اور گرج چمک: محکمہ موسمیات نے پھر وارننگ دیدی
کسانوں کو موسمی صورتحال کے مطابق زرعی سرگرمیاں ترتیب دینے کی ہدایت کی گئی ہے جبکہ سیاحوں اور مسافروں کو غیر ضروری سفر سے گریز اور احتیاط برتنے کا مشورہ دیا گیا ہے۔
محکمہ موسمیات کے مطابق ملک کے جنوبی علاقوں میں شدید گرمی کی لہر برقرار رہنے کا امکان ہے۔
