گورنر خیبرپختونخوا فیصل کریم کنڈی نے وزیراعظم شہباز شریف سے مطالبہ کیا ہے کہ گندم کی بین الصوبائی آزادانہ نقل و حمل کو فوری طور پر یقینی بنایا جائے اور خیبرپختونخوا کو اس حوالے سے ریلیف فراہم کیا جائے۔
اپنے ایک بیان میں گورنر خیبرپختونخوا نے کہاکہ آئین کے آرٹیکل 151(1) کے تحت ملک بھر میں آزاد اور منصفانہ تجارت کی ضمانت دی گئی ہے، لہٰذا اس آئینی شق پر مکمل عملدرآمد ناگزیر ہے۔
انہوں نے کہاکہ پنجاب اور خیبرپختونخوا کے درمیان گندم کی بلا رکاوٹ ترسیل نہ صرف آئینی تقاضا ہے بلکہ معاشی استحکام کے لیے بھی ضروری ہے۔
فیصل کریم کنڈی کے مطابق گندم کی بین الصوبائی نقل و حرکت پر عائد کسی بھی قسم کی مصنوعی پابندیاں تشویش ناک ہیں، کیونکہ اس طرح کی رکاوٹیں آئینی اصولوں کو متاثر کرنے کے ساتھ ذخیرہ اندوزی اور ناجائز منافع خوری کو فروغ دیتی ہیں۔
انہوں نے مزید کہاکہ ذخیرہ اندوزی اور منافع خوری کے باعث مہنگائی میں اضافہ ہوتا ہے اور عوام کو مزید مشکلات کا سامنا کرنا پڑتا ہے۔
