پاکستان شوگر ملز ایسوسی ایشن (پی ایس ایم اے) نے حکومت سے فاضل چینی کی فوری برآمد کی اجازت دینے کا مطالبہ کرتے ہوئے کہا ہے کہ اس سے ملک کو قریباً 50 کروڑ ڈالر کا قیمتی زرمبادلہ حاصل ہو سکتا ہے۔
ایسوسی ایشن کے چیئرمین چوہدری ذکا اشرف نے نائب وزیراعظم اسحاق ڈار کو لکھے گئے خط میں مؤقف اختیار کیا کہ 2025-26 کے کرشنگ سیزن کے بعد ملک میں چینی کے ذخائر 79 لاکھ میٹرک ٹن تک پہنچ گئے ہیں، جبکہ سالانہ ضرورت قریباً 66 لاکھ میٹرک ٹن ہے، یوں 13 لاکھ میٹرک ٹن فاضل چینی موجود ہے۔
مزید پڑھیں:ایکسپورٹ سبسڈی کیس میں 15 شوگر ملز کی اپیلیں سماعت کے لیے مقرر
پی ایس ایم اے کے مطابق ایک ماہ کا تزویراتی ذخیرہ محفوظ رکھنے کے باوجود قریباً 7 لاکھ 60 ہزار میٹرک ٹن چینی اضافی رہے گی، جسے برآمد کر کے قیمتی زرمبادلہ حاصل کیا جا سکتا ہے۔
ایسوسی ایشن نے خبردار کیا کہ فروخت نہ ہونے والے ذخائر کے باعث شوگر ملوں کو شدید مالی دباؤ کا سامنا ہے اور کسانوں کی ادائیگیوں سمیت بینک قرضوں کی واپسی بھی متاثر ہو رہی ہے۔
خط میں کہا گیا کہ بہتر ادائیگیوں کے باعث گزشتہ 2 برسوں میں گنے کی پیداوار اور فی ایکڑ پیداوار میں اضافہ ہوا ہے، جس کے نتیجے میں آئندہ سیزن میں مزید ریکارڈ فصل اور قریباً 20 لاکھ میٹرک ٹن اضافی چینی پیدا ہونے کا امکان ہے۔
مزید پڑھیں:نواز شریف اور مریم نواز کے خلاف چوہدری شوگر ملز کیس کی تحقیقات بند کرنے کی منظوری
پی ایس ایم اے نے حکومت سے مطالبہ کیا کہ برآمدات سے متعلق کابینہ کمیٹی کا اجلاس جلد بلایا جائے تاکہ صنعت اپنا مؤقف پیش کرسکے۔
تاہم ماضی میں متعدد مواقع پر شوگر ملز ایسوسی ایشن فاضل چینی کی برآمد کی اجازت ملنے کے باوجود مقامی منڈی میں قیمتیں قابو میں رکھنے کے اپنے وعدوں پر عمل درآمد نہ کر سکی تھی۔
