پاکستان نے اقوام متحدہ میں کہا ہے کہ امریکا اور ایران کے درمیان حالیہ امن معاہدہ خطے میں کشیدگی کم کرنے اور یمن میں سیاسی حل کے لیے نئی امید پیدا کرسکتا ہے، جبکہ اسلام آباد نے اقوام متحدہ کی سربراہی میں مذاکراتی عمل بحال کرنے پر زور دیا ہے۔
پاکستان نے کہا ہے کہ امریکا اور ایران کے درمیان ہونے والا حالیہ امن معاہدہ مشرق وسطیٰ کے تنازعات کے حل میں سفارت کاری کی اہمیت کو اجاگر کرتا ہے اور یمن میں بھی امن کوششوں کے لیے ایک نیا موقع فراہم کرسکتا ہے۔
یہ بھی پڑھیں:ایران امریکا معاہدہ: تعمیرِ نو و ترقیاتی فنڈز سمیت تہران کو سرمایہ کاری کی یقین دہانیاں
اقوام متحدہ کی سلامتی کونسل کے اجلاس سے خطاب کرتے ہوئے پاکستان کے مستقل مندوب برائے اقوام متحدہ سفیر عاصم افتخار احمد نے کہا کہ خطے میں حالیہ پیشرفت نے ثابت کیا ہے کہ کشیدگی کے خاتمے اور مذاکرات کے ذریعے مسائل کے حل کی گنجائش موجود ہے۔
انہوں نے کہا کہ امریکا اور ایران کے درمیان طے پانے والا امن معاہدہ خطے میں کشیدگی کم کرنے اور علاقائی استحکام کے فروغ کے لیے ایک خوش آئند موقع ہے۔
پاکستانی مندوب نے کہا کہ یمن گزشتہ 2014 سے تنازع کا شکار ہے، تاہم حالیہ مہینوں میں وہاں نسبتاً امن کی صورتحال دیکھنے میں آئی ہے، جہاں بڑے پیمانے پر لڑائی اور تجارتی بحری جہازوں پر حملوں میں کمی آئی ہے۔
انہوں نے عالمی برادری پر زور دیا کہ وہ اس موقع سے فائدہ اٹھاتے ہوئے اقوام متحدہ کی سربراہی میں یمن کے مسئلے کے سیاسی حل کے لیے کوششیں تیز کرے، کیونکہ نئی علاقائی کشیدگی موجودہ پیش رفت کو متاثر کرسکتی ہے۔
عاصم افتخار احمد نے یمن کی حکومت اور حوثیوں کے درمیان تقریباً 1600 قیدیوں کے تبادلے کے معاہدے کا خیر مقدم کرتے ہوئے اسے اعتماد سازی کی اہم پیشرفت قرار دیا۔ ان کے مطابق یہ اقدام ظاہر کرتا ہے کہ مذاکرات اور سفارت کاری کے ذریعے عملی نتائج حاصل کیے جاسکتے ہیں۔
یہ بھی پڑھیں:ایران امریکا معاہدے کے باوجود عالمی معیشت کو چیلنجز درپیش، آئی ایم ایف کا انتباہ
انہوں نے کہا کہ یمن میں پائیدار امن صرف ایسے سیاسی عمل کے ذریعے ممکن ہے جس کی قیادت خود یمنی عوام کریں اور جس میں تمام متعلقہ فریق شامل ہوں۔
پاکستان نے سلامتی کونسل پر زور دیا کہ وہ یمن میں امن، استحکام اور ترقی کے لیے اپنا تعمیری کردار جاری رکھے، جبکہ ملک کو درپیش انسانی اور معاشی مشکلات کے حل کے لیے عالمی تعاون بڑھانے کی ضرورت پر بھی زور دیا۔
