آل گورنمنٹ ایمپلائز گرینڈ الائنس بلوچستان نے مبینہ طور پر پُرامن احتجاجی مظاہرے اور ریلی کے دوران تشدد اور گرفتاریوں کے خلاف اپنے آئندہ کے احتجاجی لائحہ عمل کا اعلان کر دیا ہے۔
گرینڈ الائنس کے سربراہ عبدالقدوس کاکڑ اور رہنما یونس کاکڑ نے پریس کانفرنس سے خطاب کرتے ہوئے کہا کہ سرکاری ملازمین پر مبینہ تشدد اور گرفتاریوں کے خلاف احتجاجی تحریک جاری رکھی جائے گی۔
یہ بھی پڑھیں:کوئٹہ سمیت بلوچستان بھر میں شٹر ڈاؤن اور پہیہ جام ہڑتال، کاروباری مراکز بند
رہنماؤں کے مطابق 18 جون سے غیر معینہ مدت تک بلوچستان بھر کے تمام سرکاری دفاتر، تعلیمی ادارے اور دیگر سرکاری ادارے بند رہیں گے جبکہ صوبے بھر میں مکمل لاک ڈاؤن کیا جائے گا۔
انہوں نے اعلان کیا کہ احتجاجی تحریک کے دوران روزانہ کی بنیاد پر مختلف اضلاع میں ریلیاں، مظاہرے اور عوامی اجتماعات منعقد کیے جائیں گے تاکہ مطالبات کو اجاگر کیا جا سکے۔ گرینڈ الائنس کے مطابق 19 جون سے کوئٹہ میں تادمِ مرگ دھرنا دیا جائے گا، جو مطالبات کی منظوری تک جاری رہے گا۔
یہ بھی پڑھیں:بلوچستان: ہڑتال کے الزام میں 20 گریڈ پروفیسر سمیت 34 اساتذہ جبری ریٹائر
رہنماؤں نے کہا کہ ملازمین کے حقوق کے تحفظ اور مبینہ زیادتیوں کے خاتمے تک احتجاج جاری رکھا جائے گا اور تحریک کو مزید وسعت دی جائے گی۔
