وزیراعلیٰ پنجاب مریم نواز نے صوبے کے کسانوں کے لیے ایک بڑے ریلیف پیکج کا اعلان کرتے ہوئے کہا ہے کہ آئندہ 3 برسوں کے دوران پنجاب کی تاریخ میں پہلی مرتبہ 50 ہزار ٹریکٹرز کسانوں کو فراہم کیے جائیں گے۔
مزید پڑھیں: مریم نواز کا ’اپنا کھیت، اپنا روزگار‘ اسکیم کا آغاز، بے زمین کسانوں کو زرعی اراضی دینے کا منصوبہ
صوبائی محکمہ زراعت کے اجلاس کی صدارت کرتے ہوئے وزیراعلیٰ نے کہاکہ موجودہ حکومت نے کسانوں کو حقیقی معنوں میں خودمختار بنانے کے لیے عملی اقدامات کیے ہیں۔
ان کا کہنا تھا کہ ماضی میں کسی بھی حکومت نے کسانوں کو اتنی بڑی تعداد میں ٹریکٹرز فراہم نہیں کیے۔
اجلاس کے دوران کسان کارڈ پروگرام اور زرعی میکانائزیشن سے متعلق اقدامات کا تفصیلی جائزہ بھی لیا گیا۔
بریفنگ میں بتایا گیا کہ کسانوں کو اب تک 360 ارب روپے کے بلاسود قرضے جاری کیے جا چکے ہیں، جبکہ کسان کارڈ کے تحت فراہم کیے گئے قرضوں کی وصولی کی شرح 99 فیصد رہی ہے۔
مزید پڑھیں: مریم نواز کے کسان دوست ویژنری اقدام سے صوبے کے کاشتکاروں کے مقدر بدلنے لگے
بریفنگ کے مطابق جاری کیے گئے قرضوں کا 80 فیصد حصہ کسانوں نے کھاد کی خریداری پر خرچ کیا، جبکہ گزشتہ سوا دو برس سے یوریا کھاد کی قیمتوں کو بھی قابو میں رکھا گیا ہے۔
