وفاقی وزیر داخلہ و انسدادِ منشیات محسن نقوی نے اقوام متحدہ کے ہیڈکوارٹر میں سری لنکا کے وزیر داخلہ آنند وجے پالا سے ملاقات کی، جس میں دوطرفہ تعاون کے مختلف شعبوں پر تفصیلی تبادلہ خیال کیا گیا۔
ملاقات کے دوران دونوں وزرائے داخلہ نے انسدادِ منشیات کے شعبے میں مؤثر رابطہ اور تعاون کو مزید مضبوط بنانے پر اتفاق کیا۔ اس کے علاوہ پولیس ٹریننگ کے لیے باہمی تعاون بڑھانے کا بھی فیصلہ کیا گیا۔
دونوں رہنماؤں نے غیرقانونی امیگریشن اور جعلی پاسپورٹ پر سفر کرنے والے مسافروں کی روک تھام کے لیے تعاون میں اضافے پر اتفاق کیا، جبکہ اس سلسلے میں دونوں ممالک کے امیگریشن سربراہان کو فوری طور پر باہمی رابطہ قائم کرنے پر بھی اتفاق کیا گیا۔
محسن نقوی کی اقوام متحدہ میں سری لنکا کے وزیر داخلہ آنند وجے پالا سے ملاقات،دوطرفہ تعاون کے مختلف شعبوں پر تفصیلی تبادلہ خیال۔ انسدادِ منشیات کے شعبے میں مؤثر رابطہ اور تعاون کو مضبوط بنانے پر اتفاق۔ پولیس ٹریننگ کے لیے باہمی تعاون بڑھانے کا فیصلہ۔@KulAalam @MohsinnaqviC42 pic.twitter.com/BP3zUGcKp4
— Media Talk (@mediatalk922) July 8, 2026
ملاقات میں جرائم پیشہ عناصر کے نیٹ ورکس، منی لانڈرنگ کی روک تھام اور متعلقہ امور پر مفاہمتی یادداشت (ایم او یو) کے حوالے سے بھی تبادلہ خیال کیا گیا۔
محسن نقوی اور آنند وجے پالا نے دونوں ممالک کی وزارتِ داخلہ کے درمیان تعاون کو مؤثر بنانے کے لیے مشترکہ ورکنگ گروپ (جوائنٹ ورکنگ گروپ) تشکیل دینے پر بھی اتفاق کیا۔
مزید پڑھیں:محسن نقوی کی بطور چیئرمین پی سی بی تقرری لاہور ہائیکورٹ میں چیلنج
اس موقع پر ویزا سے متعلق مسائل کو ترجیحی بنیادوں پر حل کرنے اور دونوں ممالک کے درمیان تعاون کو مزید فروغ دینے کے عزم کا بھی اظہار کیا گیا۔
