وفاقی وزیر قانون و انسانی حقوق اعظم نذیر تارڑ نے ویمن ڈویلپمنٹ آرگنائزیشن کی ایگزیکٹو ڈائریکٹر کونسلر سارہ الشورہ سے ملاقات کی، جس میں خواتین کے حقوق، باہمی تعاون اور او آئی سی ممالک میں مشترکہ اقدامات پر تبادلہ خیال کیا گیا۔
اسلام آباد میں جاری کانفرنس کے دوران ہونے والی ملاقات میں اعظم نذیر تارڑ نے کہاکہ اسلام نے خواتین کو بنیادی حقوق دیے ہیں اور مسلم امہ کی ذمہ داری ہے کہ ان حقوق کا تحفظ یقینی بنائے۔
مزید پڑھیں: خواتین کے حقوق کا تحفظ، قومی اسمبلی سیکریٹریٹ اور خیبر پختونخوا محتسب میں مفاہمتی یادداشت پر دستخط
انہوں نے کہاکہ پاکستان خواتین کے لیے ترجیحی اقدامات کی پالیسی پر عمل پیرا ہے جبکہ ملک میں خواتین سیاست سمیت مختلف شعبوں میں قائدانہ کردار ادا کر رہی ہیں۔
ملاقات میں پاکستان اور ویمن ڈویلپمنٹ آرگنائزیشن کے درمیان خواتین کے حقوق اور باہمی تعاون کے فروغ پر اتفاق کیا گیا۔
پاکستان اور ترکیہ کے درمیان مفاہمتی یادداشت پر دستخط
وفاقی وزیر انسانی حقوق اعظم نذیر تارڑ نے ترکیہ کی وزیر برائے خاندانی و سماجی خدمات ماہینور اوزدمیر گوکتاش سے بھی ملاقات کی۔
ملاقات کے دوران پاکستان اور ترکیہ کے درمیان خاندان، سماجی خدمات اور تحفظ کے شعبے میں تعاون کی مفاہمتی یادداشت پر دستخط کیے گئے۔
دونوں رہنماؤں نے خاندانی نظام، خواتین کے حقوق اور خاندان کے تحفظ سے متعلق امور پر تبادلہ خیال کیا۔
پاکستان اور ترکیہ نے خاندانی فلاح، سماجی تحفظ اور ادارہ جاتی تعاون کو مزید مضبوط بنانے پر بھی اتفاق کیا۔
پاکستان اور آذربائیجان کا او آئی سی تعاون بڑھانے پر اتفاق
وفاقی وزیر انسانی حقوق اعظم نذیر تارڑ نے آذربائیجان لیبر سینٹر کی ہیڈ آف ایڈمنسٹریٹو ڈویژن جلالہ اللہ وردیئیوا سے بھی ملاقات کی۔
دونوں رہنماؤں کے درمیان خواتین کے حقوق، سماجی ترقی اور او آئی سی کے تحت تعاون پر تبادلہ خیال کیا گیا۔
مزید پڑھیں: خواتین کے حقوق کے لیے آواز اٹھانے پر فضا علی کو برطانوی پارلیمنٹ میں ایوارڈ سے نواز دیاگیا
ملاقات میں پاکستان اور آذربائیجان نے او آئی سی کے تحت باہمی تعاون کو مزید فروغ دینے پر اتفاق کیا۔
