آزاد جموں و کشمیر الیکشن کمیشن کے ترجمان نے انتخابی مواد کی ترسیل اور انتخابی عملے کی تعیناتی کے لیے وفاقی حکومت سے ہیلی کاپٹر طلب کرنے کی خبروں کی تردید کی ہے۔
ترجمان نے واضح کیا کہ وفاق سے ہیلی کاپٹر کی فراہمی کی جو درخواست کی گئی ہے، اس کا مقصد صرف پولنگ کے روز یعنی 27 جولائی کو چیف الیکشن کمشنر اور الیکشن کمیشن کے اراکین کے مختلف اضلاع کے دورے کو ممکن بنانا ہے۔
یہ بھی پڑھیں: آزاد کشمیر کے کسی حلقے میں انتخابات مؤخر نہیں ہورہے، الیکشن کمیشن نے افواہیں مسترد کردیں
سوشل میڈیا پر گردش کرنے والی خبروں کی تردید کرتے ہوئے انہوں نے بتایا کہ چیف الیکشن کمشنر اور ارکان اس روز مختلف پولنگ اسٹیشنوں کا دورہ کر کے انتخابی عمل کا جائزہ لیتے ہیں۔
انہوں نے مزید کہا کہ ہیلی کاپٹر صرف ایک دن کے لیے فراہم کیا جائے گا اور اسے انتخابی سامان یا عملے کی ترسیل کے لیے استعمال نہیں کیا جائے گا۔
مزید پڑھیں: پیپلز پارٹی نے آزاد کشمیر انتخابات کے لیے امیدواروں کا اعلان کردیا، 45 حلقوں میں انتخابی میدان سج گیا
ترجمان نے کہا کہ ماضی کے عام انتخابات میں بھی چیف الیکشن کمشنر اور الیکشن کمیشن کے ممبران پولنگ کے روز ہیلی کاپٹر کے ذریعے مختلف اضلاع اور پولنگ اسٹیشنوں کا دورہ کرتے رہے ہیں تاکہ انتخابی عمل کی نگرانی اور جائزہ لیا جا سکے۔
