الیکشن کمیشن آزاد جموں و کشمیر نے واضح کیا ہے کہ 27جولائی کو ریاست بھر میں انتخابات کے لیے پولنگ ہوگی، کسی بھی حلقے میں انتخابات مؤخر نہیں کیے جارہے۔
ترجمان الیکشن کمیشن آزاد جموں و کشمیر نے سوشل میڈیا پر گردش کرنے والی ان خبروں کی سختی سے تردید کی ہے جن میں دعویٰ کیا جا رہا تھا کہ آزاد کشمیر کے بعض حلقوں، خصوصاً پونچھ کے کچھ حلقوں میں انتخابات مؤخر کر کے 27 جولائی کے بعد کرائے جائیں گے۔
یہ بھی پڑھیں: آزاد کشمیر الیکشن: مہاجرین کی 12 نشستوں سمیت 45 انتخابی حلقوں کی حتمی فہرست جاری
ترجمان نے واضح کیا کہ آزاد کشمیر کے عام انتخابات کی تیاریاں شیڈول کے مطابق جاری ہیں اور اب تک تمام 45 انتخابی حلقوں کے امیدواروں کی حتمی فہرست جاری کی جاچکی ہے، جبکہ تمام سیاسی جماعتوں اور امیدواروں کو انتخابی نشانات بھی الاٹ کر دیے گئے ہیں۔
انہوں نے کہا کہ آزاد کشمیر کے تمام 33 براہِ راست انتخابی حلقوں اور مہاجرین جموں و کشمیر مقیم پاکستان کے تمام 12 حلقوں میں انتخابات 27 جولائی کو ہی منعقد ہوں گے۔
یہ بھی پڑھیں: آزاد کشمیر انتخابات: کون سے سابق وزرائے اعظم اس معرکے کا حصہ ہیں؟
ترجمان الیکشن کمیشن نے عوام سے اپیل کی کہ وہ سوشل میڈیا پر پھیلائی جانے والی جھوٹی اور گمراہ کن خبروں پر یقین نہ کریں اور صرف الیکشن کمیشن کی جانب سے جاری کردہ مستند معلومات پر اعتماد کریں۔
