دریائے سندھ کے کالا باغ اور تونسہ جبکہ دریائے راوی کے بلوکی اور سدھنائی کے مقامات پر اب بھی نچلے درجے کے سیلاب کی صورتحال برقرار ہے۔
پنجاب ڈیزاسٹر مینجمنٹ اتھارٹی کے مطابق گزشتہ 24 گھنٹوں کے دوران صوبے کے دریاؤں میں پانی کے بہاؤ میں بتدریج کمی ریکارڈ کی گئی ہے۔
یہ بھی پڑھیں: پنجاب میں ممکنہ سیلاب کا خدشہ، پی ڈی ایم اے کی وارننگ
پی ڈی ایم اے کے مطابق دریائے سندھ میں کالا باغ کے مقام پر پانی کا بہاؤ 3 لاکھ ایک ہزار کیوسک جبکہ تونسہ کے مقام پر 3 لاکھ 85 ہزار کیوسک ریکارڈ کیا گیا ہے۔
تاہم تونسہ بیراج میں پانی کا بہاؤ معمول کے مطابق ہے، اسی طرح دریائے ستلج اور دریائے جہلم میں بھی پانی کا بہاؤ نارمل ہے۔
وزیراعلیٰ پنجاب مریم نواز شریف کی ہدایات پر ڈی جی پی ڈی ایم اے پنجاب
عمر میلہ نے تحصیل فیروزوالہ اور مریدکے کا دورہ کیاانہوں نے متاثرہ علاقوں، حفاظتی بندوں، ریلیف کیمپس اور امدادی سرگرمیوں
کا جائزہ لیا اور تمام متعلقہ اداروں کو مکمل الرٹ رہنے کی ہدایت کی۔#pdma #ndma pic.twitter.com/Ijn8QmxxwL— PDMA Punjab Official (@PdmapunjabO) July 27, 2026
ادارے کا کہنا ہے کہ دریائے چناب میں سیلابی صورتحال میں مسلسل بہتری آ رہی ہے اور مرالہ، خانکی، قادر آباد، تریموں اور پنجند کے مقامات پر پانی کا بہاؤ معمول پر آ چکا ہے۔
پی ڈی ایم اے کے مطابق دریائے راوی میں بلوکی کے مقام پر 63 ہزار کیوسک اور سدھنائی کے مقام پر 53 ہزار کیوسک پانی گزر رہا ہے، جہاں نچلے درجے کی سیلابی صورتحال برقرار ہے، جبکہ جسڑ اور شاہدرہ کے مقامات پر پانی کا بہاؤ معمول کے مطابق ہے۔
مزید پڑھیں: ملک بھر میں مون سون کی تباہ کاریاں جاری، مزید 11 افراد جاں بحق، سندھ میں مزید بارشوں کی پیشگوئی
ادھر وزیرآباد کے نالہ پلکھو میں اونچے درجے کی سیلابی صورتحال برقرار ہے، جہاں پانی کا بہاؤ 4 ہزار کیوسک ریکارڈ کیا گیا، جبکہ نارووال کے نالہ بسنتر میں ایک ہزار کیوسک پانی کے بہاؤ کے ساتھ نچلے درجے کا سیلاب موجود ہے۔
ڈی جی پی ڈی ایم اے عمر میلہ نے کہا کہ بالائی علاقوں میں بارشوں کے باعث دریاؤں میں پانی کے بہاؤ میں اضافہ ہوا تھا، تاہم دریائے چناب کے بالائی کیچمنٹ ایریاز میں بارشیں رک چکی ہیں اور گزشتہ 24 گھنٹوں سے دریا میں طغیانی میں مسلسل کمی دیکھی جا رہی ہے۔
مزید پڑھیں: دریائے چناب میں درمیانے درجے کا سیلاب، این ڈی ایم اے کا مختلف علاقوں کے لیے الرٹ
انہوں نے کہا کہ حکومت پنجاب نے ممکنہ سیلاب سے متاثرہ علاقوں میں تمام ضروری انتظامات مکمل کر لیے ہیں اور فلڈ ریلیف کیمپس میں متاثرین کو بنیادی سہولیات، خوراک اور ادویات فراہم کی جائیں گی۔
ڈی جی پی ڈی ایم اے نے ہدایت کی کہ دریاؤں کے پاٹ میں موجود افراد فوری طور پر محفوظ مقامات پر منتقل ہو جائیں اور موسم و سیلاب کی صورتحال کے پیش نظر احتیاطی تدابیر پر سختی سے عمل کریں۔
