بالی ووڈ اداکارہ اور بھارتیہ جنتا پارٹی (بی جے پی) کی رکنِ پارلیمنٹ کنگنا رناوت نے کاکروچ جنتا پارٹی تحریک سے وابستہ بعض نوجوان مظاہرین کو ’گٹر جنریشن‘ قرار دیا۔
کنگنا رناوت نے انسٹاگرام پر احتجاجی مظاہروں کی ویڈیوز پر تبصرہ کرتے ہوئے بعض نوجوان مظاہرین کے رویے اور زبان پر تنقید کی۔ انہوں نے لکھا کہ انہوں نے اپنی زندگی میں ایک جگہ اتنی ’بدصورتی‘کبھی نہیں دیکھی اور سوال اٹھایا کہ ایسی نسل کی تربیت کون کر رہا ہے۔
یہ بھی پڑھیں: کنگنا رناوت کی کاکروچ پارٹی رہنما کے خلاف نازیبا زبان، ترجمان سی جے پی کا کرارا جواب
انہوں نے یہ بھی لکھا کہ بھارت خوبصورت لوگوں کا مسکن ہے، آپ خود کو کاکروچ کہتے ہیں اور دکھتے یا برتاؤ بھی بالکل ویسا ہی کرتے ہیں اس میں کوئی تضاد یا انوکھا موازنہ نہیں ہے بلکہ یہ محض دنیا کو اپنی غلاظت، کوڑے کرکٹ اور بدصورتی کا سامنا کروانا ہے۔
ان کا کہنا تھا کہ ان ویڈیوز کو دیکھ کر شدید ذہنی کوفت کا شکار ہوئی ہوں، مجھے اب کچھ سکون اور ’ڈیجیٹل ڈیٹوکس‘کی ضرورت ہے۔ کنگنا نے مزید لکھا کہ میں انہیں ‘جنریشن گٹر’ (Generation Gutter) کہتی ہوں، ان میں سے کچھ کے پاس نظام کو دینے کے لیے کچھ بھی نہیں ہے، وہ پڑھائی لکھائی میں اچھے نہیں ہیں، وہ اتنے بدصورت اور بدکردار ہیں کہ گھر سنبھالنے کے بھی قابل نہیں۔
اس بیان پر اپوزیشن جماعتوں، سی جے پی رہنماؤں اور سوشل میڈیا صارفین کی جانب سے سخت ردِعمل سامنے آیا جس کے بعد کنگنا رناوت نے ایک ویڈیو پیغام جاری کرتے ہوئے وضاحت کی کہ ان کے الفاظ کا مقصد پوری جنرل زی نسل کو تنقید کا نشانہ بنانا نہیں تھا بلکہ وہ صرف ان مظاہرین کے رویے پر اعتراض کر رہی تھیں جو ان کے بقول عوامی مقامات پر غیر اخلاقی اور نامناسب زبان استعمال کر رہے تھے۔
یہ بھی پڑھیں: کنگنا رناوت کا راہول گاندھی سے شادی کا حیران کن دعویٰ؟ وائرل پوسٹ پر نئی بحث چھڑ گئی
انہوں نے کہا کہ میڈیا نے ان کے بیان کو سیاق و سباق سے ہٹ کر پیش کیا، جبکہ وہ متعدد مواقع پر جنرل زی کے باصلاحیت نوجوانوں، اسٹارٹ اپس اور NEET کے طلبہ کی کامیابیوں کی تعریف بھی کر چکی ہیں۔
