وزیراعظم کے مشیر برائے بین الصوبائی رابطہ سینیٹر رانا ثنا اللہ نے یومِ استحصالِ کشمیر کے موقع پر کہا ہے کہ 5 اگست بھارتی غیر قانونی زیرِ تسلط جموں و کشمیر کے عوام پر ڈھائے جانے والے مظالم کی یاد دلاتا ہے۔
مزید پڑھیں:’تمہارے ساتھ تھے اور ساتھ ہم رہیں گے‘، آئی ایس پی آر کا یومِ استحصالِ کشمیر پر خصوصی نغمہ جاری
اپنے پیغام میں انہوں نے کہا کہ بھارت نے 5 اگست 2019 کو مقبوضہ جموں و کشمیر کی خصوصی آئینی حیثیت ختم کرکے کشمیری عوام کے حقِ خودارادیت پر براہِ راست حملہ کیا۔ انہوں نے کہا کہ پاکستان جموں و کشمیر کی حیثیت، آبادی کے تناسب اور سیاسی شناخت کو یکطرفہ طور پر تبدیل کرنے کی ہر کوشش کو مسترد کرتا ہے۔
رانا ثناء اللہ نے کہا کہ 5 اگست 2019 کے بعد مقبوضہ جموں و کشمیر میں انسانی حقوق کی صورتحال مزید ابتر ہوئی ہے، جبکہ ماورائے عدالت قتل، جبری گمشدگیاں، فوجی کارروائیاں اور طویل حراستوں نے مقامی آبادی میں عدم تحفظ کو بڑھا دیا ہے۔
یومِ استحصالِ کشمیر: پاکستان کشمیری عوام کی ہر سطح پر حمایت جاری رکھے گا، رانا ثنا اللہ
رانا ثنا اللہ نے کہا کہ 5 اگست بھارتی غیر قانونی زیرِ تسلط جموں و کشمیر کے عوام پر ڈھائے جانے والے مظالم کی یاد دلاتا ہے۔@AmirSaeedAbbasi @HussainAhmedCh8 @MAnwarRaza pic.twitter.com/UJxH1FgKaE— Media Talk (@mediatalk922) August 5, 2026
انہوں نے کہا کہ اس موقع پر وہ اپنے کشمیری بھائیوں اور بہنوں کے ساتھ مکمل یکجہتی کا اظہار کرتے ہیں۔ ان کا کہنا تھا کہ **”کشمیر پاکستان ہے اور پاکستان کشمیر ہے”** جبکہ تحریکِ آزادیٔ جموں و کشمیر، تحریکِ تکمیلِ پاکستان ہے۔
مشیر وزیراعظم نے کہا کہ پاکستان کشمیری عوام کی لازوال قربانیوں، ہمت، ثابت قدمی اور انصاف کے لیے غیرمتزلزل عزم کو سلام پیش کرتا ہے اور ان کی منصفانہ جدوجہد کی اخلاقی، سیاسی اور سفارتی حمایت جاری رکھے گا۔
مزید پڑھیں:یومِ استحصالِ کشمیر: عالمی برادری بھارتی مظالم کا نوٹس لے، چیئرمین سینیٹ یوسف رضا گیلانی
رانا ثناء اللہ نے اقوامِ متحدہ اور عالمی برادری سے مطالبہ کیا کہ وہ مقبوضہ جموں و کشمیر میں انسانی حقوق کی خلاف ورزیوں کا نوٹس لے اور مسئلہ کشمیر کو اقوامِ متحدہ کی سلامتی کونسل کی متعلقہ قراردادوں کے مطابق حل کرانے کے لیے مؤثر کردار ادا کرے۔ انہوں نے کہا کہ کشمیر کا مسئلہ صرف کشمیریوں کا نہیں بلکہ انسانیت اور عالمی انصاف کا مسئلہ ہے۔
