ویلنگٹن میں پاک نیوزی لینڈ مذاکرات، تعلیم کے شعبے میں تعاون کا اہم معاہدہ، زراعت میں بھی روابط بڑھانے پر اتفاق

پاکستان اور نیوزی لینڈ نے زراعت اور تعلیم کے شعبوں پر خصوصی توجہ کے ساتھ باہمی تعاون بڑھانے پر اتفاق کیا ہے۔

دفترِ خارجہ کی جانب سے ہفتہ کے روز جاری اعلامیے کے مطابق ویلنگٹن میں دونوں ممالک کے مابین مشترکہ تجارتی کمیٹی (جے ٹی سی) کا اجلاس منعقد ہوا، جس میں تعلیمی تعاون کے معاہدے پر دستخط سمیت متعدد اہم فیصلے کیے گئے۔

واضح رہے کہ پاکستان اور نیوزی لینڈ دونوں دولتِ مشترکہ کے رکن ممالک ہیں اور دیرینہ خوشگوار تعلقات رکھتے ہیں۔

دونوں ممالک کے مابین سابق فوجی صدر جنرل پرویز مشرف کے دورۂ آکلینڈ کے دوران بھی زراعت اور تعلیم کے شعبوں میں تعاون زیرِ بحث آیا تھا۔

یہ بھی پڑھیں:4 سفارتکاروں نے صدر مملکت آصف علی زرداری کو اسناد سفارت پیش کیں

حالیہ برسوں میں عالمی معیشت میں غیریقینی صورتحال اور مشرقِ وسطیٰ کی جنگ کے اثرات کے پیشِ نظر خطے کے ممالک نئی تجارتی شراکت داریوں کی تلاش میں ہیں۔

تیسرا جے ٹی سی اجلاس اور سیاسی مشاورت کا پانچواں دور

دفترِ خارجہ کے مطابق پاکستان اور نیوزی لینڈ کے مابین جوائنٹ ٹریڈ کمیٹی کا تیسرا اجلاس اور سیاسی مشاورت کا پانچواں دور جمعرات کو ویلنگٹن میں منعقد ہوا، جسے دونوں ممالک کے دوطرفہ تعلقات کو مزید مستحکم کرنے کی جانب ایک اہم قدم قرار دیا گیا۔

اجلاس کا سب سے نمایاں نتیجہ پاکستان اور نیوزی لینڈ کے مابین تعلیمی تعاون کے معاہدے پر دستخط رہا، جس سے توقع ہے کہ تعلیمی شعبے میں دونوں ممالک کے مابین تعاون میں نمایاں اضافہ ہوگا۔

زراعت اور تجارت میں تعاون بڑھانے پر غور

جے ٹی سی اجلاس کے دوران دونوں فریقین نے منڈی تک رسائی بہتر بنانے اور پائیدار زراعت میں تعاون بڑھانے پر تفصیلی گفتگو کی، جس میں اون کی پیداوار اور فصلوں کے تحفظ کے شعبے میں تکنیکی تعاون کے امکانات بھی زیرِ غور آئے۔

مذاکرات کا محور دوطرفہ تجارت اور سرمایہ کاری کو فروغ دینا رہا، جس میں ٹیکنالوجی، تعلیم اور خدمات کے شعبوں پر خصوصی توجہ مرکوز کی گئی۔

یہ بھی پڑھیں: عالمی تنازعات کا حل صرف سفارتکاری سے ہی ممکن ہے، اسحاق ڈار اور کاجا کالاس کے درمیان اہم ملاقات

اس کے علاوہ معاشی تعاون کو آگے بڑھانے کے لیے ادارہ جاتی طریقہ کار وضع کرنے پر بھی بات چیت کی گئی۔ جے ٹی سی اجلاس میں پاکستان کی نمائندگی سیکریٹری تجارت جواد پال خواجہ نے کی، جبکہ نیوزی لینڈ کے وفد کی قیادت اس ملک کی وزارتِ خارجہ و تجارت میں امریکہ و ایشیا گروپ کے نائب سیکرٹری گراہم مورٹن نے کی۔

سیاسی مشاورت میں خطے کی صورتحال پر بھی بات چیت

سیاسی مشاورت کے دوران دونوں فریقین نے دوطرفہ تعلقات کا جامع جائزہ لیا اور علاقائی و بین الاقوامی صورتحال پر بھی خیالات کا تبادلہ کیا، جبکہ کثیرالجہتی فورمز میں باہمی رابطہ کاری بڑھانے پر بھی اتفاق کیا گیا۔

اس نشست کی مشترکہ صدارت اضافی سیکریٹری خارجہ (ایشیا پیسیفک) سفیر ڈاکٹر سید علی اسد گیلانی نے پاکستانی جانب سے کی، جبکہ نیوزی لینڈ کے وفد کی سربراہی بھی گراہم مورٹن نے کی۔

دفترِ خارجہ کے مطابق اسلام آباد اور ویلنگٹن نے اعلیٰ سطح کے روابط، معاشی ترقی، سائنس و ٹیکنالوجی، تعلیم، انسدادِ دہشتگردی، سرحد پار جرائم اور عوامی رابطوں سمیت باہمی دلچسپی کے متعدد شعبوں میں تعاون بڑھانے کے امکانات کا جائزہ لیا۔

مشرقِ وسطیٰ اور خطے کی صورتحال پر پاکستان کی بریفنگ

سفیر گیلانی نے نیوزی لینڈ کے وفد کو مشرقِ وسطیٰ میں کشیدگی کم کرنے کے لیے پاکستان کی کوششوں سے آگاہ کیا، جہاں اسلام آباد آبنائے ہرمز کی صورتحال کو حل کرنے کی کوششوں میں فعال کردار ادا کر رہا ہے۔

دفترِ خارجہ کے مطابق مورٹن نے مشرقِ وسطیٰ امن عمل میں پاکستان کے تعمیری کردار کو سراہا۔ سفیر گیلانی نے جنوبی ایشیا کی صورتحال، بھارت کے زیرِ قبضہ کشمیر اور بھارت کی جانب سے سندھ طاس معاہدے کی ‘مسلسل خلاف ورزیوں’ پر بھی بات چیت کی۔

واضح رہے کہ بھارت نے گزشتہ سال دونوں ممالک کے مابین کشیدگی بڑھنے کے بعد اپریل 2025 کے آخر میں یکطرفہ طور پر سندھ طاس معاہدہ معطل کرنے کا فیصلہ کیا تھا اور تب سے پانی کا معاملہ دونوں جوہری ہمسایہ ممالک کے مابین کشیدگی کا ایک اہم نکتہ بنا ہوا ہے، جسے پاکستان بارہا عالمی فورمز پر اٹھاتا رہا ہے۔

دوطرفہ تجارت کا حجم اور اہم مصنوعات

دفترِ خارجہ کے بیان کے مطابق مجموعی مذاکرات نے دونوں ممالک کو دوطرفہ تعلقات میں پیش رفت کا جائزہ لینے، شراکت داری کے نئے شعبے تلاش کرنے اور ایک آگے دیکھنے والے، باہمی طور پر فائدہ مند تعلقات کے مشترکہ عزم کا اعادہ کرنے کا موقع فراہم کیا۔

یہ بھی پڑھیں:مشرق وسطیٰ میں امن کے لیے اسلام آباد میں بڑی بیٹھک کی تیاریاں مکمل، امریکا اور ایران کا وفود پاکستان بھیجنے کا اعلان

دفترِ خارجہ کی ویب سائٹ کے مطابق دونوں ممالک کے مابین دوطرفہ تجارت کا حجم 12 ملین ڈالر ہے، جہاں پاکستان کی نیوزی لینڈ کو بنیادی برآمدات میں ٹیکسٹائل مصنوعات، ملبوسات، چاول، چمڑے کی اشیا اور کھیلوں کا سامان شامل ہے۔

اس کے مقابلے میں پاکستان نیوزی لینڈ سے بنیادی طور پر ڈیری مصنوعات، لکڑی کا گودا، کاغذ، خوردنی تیل، لکڑی، لوہا و اسٹیل اور برقی مشینری درآمد کرتا ہے۔