بالی ووڈ کے سابق سپر اسٹار گووندا کا گھر ٹوٹنے سے بچ گیا، اہلیہ سنیتا آہوجا نے طلاق کا مقدمہ واپس لے لیا

بالی ووڈ اداکار گووندا اور ان کی اہلیہ سنیتا آہوجا کے درمیان 40 سالہ ازدواجی زندگی کو درپیش بحران بظاہر ختم ہوگیا ہے۔

یہ بھی پڑھیں: کون ہیں کومل رانی سوارنکر؟ گووندا کی ساتھی اداکارہ سے تعلق کی افواہیں گرم

اداکار کے منیجر ششی سنہا کے مطابق سنیتا آہوجا نے اپنے شوہر کے خلاف دائر کی گئی طلاق کی درخواست باضابطہ طور پر واپس لے لی ہے جس کے بعد کئی ہفتوں سے جاری قیاس آرائیوں کا خاتمہ ہوگیا ہے۔

ششی سنہا نے بھارتی اخبار ’انڈین ایکسپریس‘ سے گفتگو کرتے ہوئے کہا کہ دونوں کے درمیان علیحدگی نہیں ہو رہی۔ ان کے مطابق سنیتا نے اس وقت کے جذبات کے تحت طلاق کا فیصلہ کیا تھا تاہم بعد میں حالات کو دیکھتے ہوئے صلح کا راستہ اختیار کیا۔

انہوں نے کہا کہ گووندا اور ان کے بچوں نے سنیتا کے فیصلے پر غیر جانب دارانہ مؤقف اختیار کیا ہے۔ ان کے بقول یہ معاملہ صرف ایسا ہے کہ کسی شخص کو اپنی غلطی کا احساس ہوا اور اس نے گھر واپس آنے کا فیصلہ کیا جو ایک مثبت بات ہے۔

ششی سنہا نے کہا کہ ان کا واحد افسوس یہ ہے کہ یہ معاملہ عوامی سطح پر بہت زیادہ زیرِبحث آگیا تاہم رشتوں میں ایسے حالات پیش آجاتے ہیں۔

مزید پڑھیے: ’وہ مجھے گالیاں دیتی ہے، میں برداشت کرلیتا ہوں‘، گووندا نے اہلیہ کے الزامات پر خاموشی توڑ دی

انہوں نے کہا کہ سنیتا جی نے گووندا کے خلاف طلاق کا مقدمہ واپس لے لیا ہے کوئی علیحدگی نہیں ہو رہی۔ انہوں نے جو کچھ کہا وہ اس وقت کے جذبات تھے اور اب انہوں نے درخواست واپس لے لی ہے۔ یہ خوشی کی خبر ہے جو کچھ ہوا وہ اچھا نہیں تھا لیکن اب وہ ماضی کا حصہ ہے۔

طلاق کا معاملہ کیسے شروع ہوا؟

سنیتا آہوجا نے دسمبر 2024 کے آغاز میں باندرہ فیملی کورٹ سے رجوع کیا تھا۔ انہوں نے ہندو میرج ایکٹ کی ان دفعات کے تحت طلاق کی درخواست دائر کی تھی جن میں مبینہ ظلم، علیحدگی اور بے وفائی کو شادی ختم کرنے کی بنیادوں میں شامل کیا جاتا ہے۔

عوامی سطح پر اختلافات

گووندا اور سنیتا کے درمیان اختلافات اس وقت زیادہ نمایاں ہوئے جب سنیتا نے فلم ’روپا‘ کی تشہیری مہم کے دوران اپنے شوہر کی ساتھی اداکارہ کومل رانی سوارنکر کے ساتھ قربت پر اعتراض کیا۔

فوٹوگرافرز سے گفتگو کرتے ہوئے سنیتا نے اشارہ دیا کہ گووندا کا رویہ غیر معمولی ہے۔ انہوں نے یہ سوال بھی اٹھایا کہ ماضی میں جب انہوں نے شوہر پر بے وفائی کے الزامات لگائے تھے تو ان پر تنقید کرنے والے مداح اب خاموش کیوں ہیں۔

سنیتا نے گووندا اور ان کی ساتھی اداکارہ کے درمیان عمر کے فرق پر بھی تبصرہ کرتے ہوئے کہا تھا کہ گووندا کو اپنے تاثر اور عوامی ردعمل کا زیادہ خیال رکھنا چاہیے۔

اس کے جواب میں گووندا نے بھی میڈیا سے گفتگو کرتے ہوئے کہا تھا کہ سنیتا کے عوامی بیانات مناسب نہیں تھے اور یہ نوجوانوں کے لیے اچھا پیغام نہیں دیتے کہ کسی ذاتی معاملے کو کس طرح عوام کے سامنے پیش کیا جائے۔

مزید پڑھیں: گووندا کو کب اور کس شرط پر معافی ملے گی؟ سنیتا آہوجا نے بتادیا

گووندا نے کہا تھا کہ انہوں نے ماضی میں سنیتا کے کئی کاموں میں ان کی حمایت کی جن میں کھانا پکانے کے شو میں شرکت اور ریئلٹی پروگرام ’لاک اپ‘ میں ان کی موجودگی شامل ہے۔ ان کے مطابق سنیتا کو بھی ان کے موجودہ فلمی منصوبوں کے لیے اسی طرح تعاون کرنا چاہیے تھا نہ کہ انہیں نقصان پہنچانے والے بیانات دینے چاہییں۔

انہوں نے عمر کے فرق پر ہونے والی تنقید کو بھی مسترد کرتے ہوئے کہا تھا کہ فلمی صنعت میں سینئر اداکار طویل عرصے سے کم عمر ساتھی اداکاروں کے ساتھ کام کرتے آئے ہیں اور یہ کوئی نئی بات نہیں۔ انہوں نے سنیتا سے اپنے پوڈکاسٹ پر سخت بیانات دینے سے گریز کرنے کی اپیل بھی کی تھی۔

صلح کے اشارے پہلے ہی سامنے آ گئے تھے

دلچسپ بات یہ ہے کہ دونوں کے درمیان صلح کے اشارے چند ماہ پہلے ہی سامنے آنا شروع ہوگئے تھے۔

جون میں جب سنیتا آہوجا ریئلٹی شو ’لاک اپ: سچ یا سزا‘ سے باہر ہوئیں تو گووندا انہیں لینے کے لیے موجود تھے۔ اس موقعے پر انہوں نے مشکل دور سے گزرنے کا ذکر کرتے ہوئے کہا تھا کہ وہ سمجھتے ہیں کہ دونوں نے ایک سخت مرحلہ دیکھا ہے۔

یہ بھی پڑھیے: بالی ووڈ اداکار گووندا کی اہلیہ سنیتا آہوجا کا بڑا ’ یوٹرن‘

گووندا نے یہ بھی کہا تھا کہ وہ اب بھی سنیتا کے ساتھ اپنے رشتے کے لیے پرعزم ہیں اور تفریحی صنعت میں عوامی تنازعات کو زندگی کا ایک حصہ قرار دیا تھا۔