بانی پاکستان تحریک انصاف عمران خان کو سپریم کورٹ کے فیصلے کی روشنی میں علاج کے لیے آج رات شفا انٹرنیشنل اسپتال منتقل کیے جانے کا امکان ہے۔
ذرائع کے مطابق وزیراعظم شہباز شریف سے وفاقی وزیر داخلہ محسن نقوی کی اہم ملاقات جاری ہے، جس میں سپریم کورٹ کے فیصلے پر عمل درآمد اور عمران خان کی اسپتال منتقلی کے معاملے پر مشاورت کی جارہی ہے۔
یہ بھی پڑھیں: عمران خان کو علاج کے لیے بیرون ملک بھیجنے کا فیصلہ بھی ہوسکتا ہے: طارق فضل چوہدری
ذرائع کا کہنا ہے کہ عمران خان کی اسپتال منتقلی کے پیش نظر وفاقی پولیس کو الرٹ کردیا گیا ہے، جبکہ اسپتال کے ایک حصے کو سب جیل قرار دیے جانے کا امکان ہے۔ اس حوالے سے مشاورت مکمل ہونے کے بعد چیف کمشنر اسلام آباد کی جانب سے باضابطہ نوٹیفکیشن جاری کیا جائے گا۔
دوسری جانب ذرائع کے مطابق عمران خان کو اڈیالہ جیل سے اسپتال منتقل کرنے کے انتظامات مکمل کرلیے گئے ہیں۔ آئی جی اسلام آباد سمیت پولیس کی اعلیٰ قیادت شفا انٹرنیشنل اسپتال پہنچ گئی ہے، جہاں پولیس کے سینئر افسران آئی جی اسلام آباد کو سکیورٹی انتظامات کے حوالے سے بریفنگ دے رہے ہیں۔
یہ بھی پڑھیں: عمران خان کی اسپتال منتقلی پر حکومت کی نظرثانی درخواست دوبارہ دائر کردی گئی، فیصلہ آج یا کل متوقع ہے، رانا ثنااللہ
واضح رہے کہ سپریم کورٹ نے عمران خان کو علاج کے لیے شفا انٹرنیشنل اسپتال منتقل کرنے کا حکم دیا تھا اور حکومت کو مقررہ مدت میں عدالتی حکم پر عمل درآمد کی ہدایت کی گئی تھی۔
