حافظ طاہر محمود اشرفی نے کہا ہے کہ مدارس کی رجسٹریشن اور بینک اکاؤنٹس سمیت دیگر امور پر پیشرفت کے لیے فیلڈ مارشل سید عاصم منیر نے خصوصی دلچسپی لی اور وزیراعظم نے بھی متعلقہ ہدایات جاری کیں۔
یہ بھی پڑھیں: مدارس کے مسائل کا حل ناگزیر، بینک اکاؤنٹس سمیت دیگر معاملات میں کردار ادا کریں گے، مولانا طاہر اشرفی
نظام المدارس پاکستان کے تحت پوزیشن حاصل کرنے والے طلبا کے اعزاز میں سالانہ تقریب تقسیم انعامات منعقد ہوئی جس میں چیئرمین پاکستان علما کونسل اور وزیراعظم کی قومی پیغام امن کمیٹی کے کوآرڈینیٹر حافظ طاہر محمود اشرفی سمیت ملک اور بیرون ملک سے آئے علما و شیوخ کی بڑی تعداد نے شرکت کی۔
تقریب سے خطاب کرتے ہوئے حافظ طاہر محمود اشرفی نے کہا کہ مدارس عربیہ پاکستان دین کے ساتھ ساتھ ملک و قوم کی بھی خدمت کر رہے ہیں۔ ان کا کہنا تھا کہ مدارس میں طلبا کو دینی تعلیم کے ساتھ دنیاوی تعلیم بھی دی جا رہی ہے جبکہ ان کی تربیت ایک ایسا اہم عمل ہے جو مدارس کے مثبت کردار کو ظاہر کرتا ہے۔
انہوں نے کہا کہ نظام المدارس پاکستان کے تحت 33 سے 35 ہزار مدارس رجسٹرڈ ہیں جبکہ پاکستان میں مدارس کی تعلیم کے لیے 15 بورڈز کام کر رہے ہیں۔
حافظ طاہر محمود اشرفی نے کہا کہ حکومت کی کوششوں اور فیلڈ مارشل سید عاصم منیر کی خصوصی کاوشوں کے باعث مدارس کے حوالے سے اجلاس منعقد ہو رہا ہے۔ ان کا کہنا تھا کہ مدارس کے نمائندے کے طور پر ان کے مفادات کے تحفظ کے لیے کردار ادا کرتے رہیں گے۔
انہوں نے کہا کہ وہ ملک پاکستان کے نظریے کے محافظ ہیں اور مدارس کے طلبا دین کی سربلندی اور پاکستان کے استحکام کے لیے ہر وقت افواج پاکستان کے ساتھ کھڑے ہیں۔ ان کے مطابق پاک افواج ملک کی محافظ ہیں۔
مزید پڑھیے: کارگل کے شہداء پر بیان، متحدہ مدارس کونسل نے مولانا فضل الرحمان سے لاتعلقی کیوں اختیار کی؟
حافظ طاہر محمود اشرفی نے کہا کہ حالیہ معرکہ حق کے بعد دشمن سوشل میڈیا کے ذریعے پاکستان کے خلاف مہم چلا رہا ہے۔ انہوں نے کہا کہ جو عناصر فوج، قوم اور ریاست کے درمیان تقسیم پیدا کرنا چاہتے ہیں، انہیں پیغام ہے کہ قوم متحد ہے۔
انہوں نے کہا کہ پارلیمنٹ ملک کا ایک اہم ادارہ ہے اور ملک کا قانون اسلامی ہے۔ ان کا کہنا تھا کہ مدارس کی رجسٹریشن اور بینک اکاؤنٹس کے حوالے سے ہونے والے اجلاس میں اہم فیصلے کیے جانے کی توقع ہے۔
حافظ طاہر محمود اشرفی نے کہا کہ فیلڈ مارشل سید عاصم منیر نے مدارس کے معاملات کے حوالے سے ذاتی دلچسپی لی جبکہ وزیراعظم نے بھی اس حوالے سے ضروری احکامات جاری کیے ہیں۔
انہوں نے بتایا کہ متحدہ مدارس کونسل کے پلیٹ فارم سے مدارس کے مفادات کا تحفظ کیا جائے گا۔ ان کا کہنا تھا کہ مدارس فتنہ الخوارج اور فتنۃ الہندوستان کے خلاف بھی بھرپور کردار ادا کر رہے ہیں۔
مزید پڑھیں: مدارس کی بندش سے متعلق خبروں میں صداقت نہیں، معاملہ اتفاقِ رائے سے حل کریں گے: وزیراعلیٰ بلوچستان
انہوں نے ربیع الاول کے موقع پر پیغام امن کی جانب سے دیے گئے خطبہ جمعہ کا حوالہ دیتے ہوئے کہا کہ اس کا عنوان اسلامی ریاست میں اقلیتوں کے حقوق رکھا گیا تھا جس کا مقصد اسلامی تعلیمات کے مطابق امن اور رواداری کے پیغام کو اجاگر کرنا تھا۔
