گوگل نے اپنے مصنوعی ذہانت کے معاون جیمینائی لائیو میں نئی سہولیات متعارف کرا دی ہیں، جن کے ذریعے صارف صرف آواز کے ذریعے مختلف کام شروع کروا سکے گا اور بعض کام اس کی دوبارہ مداخلت کے بغیر بعد میں بھی مکمل ہوتے رہیں گے۔
یہ بھی پڑھیں: جیمینائی میں 13 نئی ایپس شامل، اب تفریح سے روزمرہ معاملات تک مزید کام ہوں گے
نئی اپ ڈیٹ میں سب سے نمایاں سہولت اسپارک ہے، جو صارف کی غیر مرتب گفتگو یا خیالات کو سمجھ کر انہیں قابلِ استعمال مواد میں تبدیل کرے گی۔ مثال کے طور پر سفر کے دوران کسی منصوبے کے بارے میں خیالات بیان کرنے پر جیمینائی انہیں گوگل ڈاکس میں ایک منظم خاکے کی شکل دے سکتا ہے۔
اسپارک ایسے کام بھی سنبھال سکے گا جو کئی دنوں تک جاری رہتے ہیں، جیسے محفوظ شدہ کھانوں کی ترکیبوں کی بنیاد پر مسلسل بڑھنے والی خریداری کی فہرست تیار کرنا۔
گوگل نے ڈیلی بریف بھی متعارف کرایا ہے۔ صارف صرف یہ پوچھ کر کہ ‘میرا روزانہ کا خلاصہ کیا ہے؟’ جی میل اور کیلنڈر کی سرگرمیوں کا صوتی خلاصہ سن سکے گا۔ اس کا مقصد دن کے آغاز میں فون کی اسکرین دیکھے بغیر اہم معلومات سے آگاہ کرنا ہے۔
یہ بھی پڑھیں: گوگل کی جیمینائی ایپ کی بڑی کامیابی، صارفین کی تعداد 1 ارب سے تجاوز کرگئی
جیمینائی اب آواز کے ذریعے جی میل کے پیغامات کو بھی منظم کر سکے گا۔ صارف اہم پیغامات تلاش کرنے، خلاصہ بنانے، نمایاں کرنے، محفوظ کرنے یا حذف کرنے کی ہدایت دے سکے گا، مثلاً یہ معلوم کرنا کہ بچے کے اسکول سے کوئی فوری نوعیت کا پیغام تو نہیں آیا۔
نئی سہولیات جیمینائی کی ذاتی معلومات یاد رکھنے کی صلاحیت کو بھی مزید بہتر بنائیں گی۔ یہ صلاحیت جی میل، تصاویر، سرچ اور یوٹیوب سمیت منسلک خدمات کے ساتھ سابقہ گفتگو اور معلومات کو جوڑنے میں مدد دے گی۔
یہ بھی پڑھیں: گوگل نے میٹا پر جیمینائی اے آئی ماڈلز کے استعمال کی حد مقرر کردی
اس کے نتیجے میں صارف کئی ماہ قبل کسی سفر کے دوران جانے والے ریستوران کا مقام دوبارہ تلاش کرنے یا سابقہ گفتگو میں زیرِ بحث آنے والی کھانے کی ترکیب حاصل کرنے جیسے سوالات بھی کرسکے گا۔
