اقوام متحدہ کی جنرل اسمبلی نے دنیا کا نقشہ زیادہ درست انداز میں دکھانے کے لیے ایک نئی قرارداد منظور کرلی ہے، جس کے تحت ایسے نقشے کے استعمال کی حوصلہ افزائی کی گئی ہے جس میں افریقہ اور دیگر براعظم اپنے اصل رقبے کے زیادہ قریب نظر آتے ہیں۔ قرارداد کے حق میں 164 ممالک نے ووٹ دیا، جبکہ امریکا نے مخالفت کی اور 6 ممالک نے ووٹنگ میں حصہ نہیں لیا۔
فرانسیسی خبر رساں ادارے اے ایف پی کے مطابق نئی قرارداد میں ’مساوی زمین‘ نقشے کی حمایت کی گئی ہے، جس میں افریقہ، لاطینی امریکا، جنوبی ایشیا اور اوشیانا پہلے استعمال ہونے والے نقشے کے مقابلے میں زیادہ بڑے دکھائی دیتے ہیں۔
The UN General Assembly has backed a resolution to change to maps that more accurately show the true size of Africa. Supporters of the resolution say the widely used, and centuries-old, Mercator world map distorts the size of countries, thereby changing how they are seen. pic.twitter.com/NI6oDPyrWx
— Al Jazeera English (@AJEnglish) September 5, 2026
اقوام متحدہ نے رکن ممالک پر زور دیا ہے کہ وہ مرکیٹر کے بنائے نقشے کے بجائے نئے نقشے کو استعمال کریں۔ مرکیٹر نقشہ 1569 میں سمندری سفر اور راستوں کی رہنمائی کے لیے تیار کیا گیا تھا۔ تاہم اس میں دنیا کے مختلف علاقوں کے رقبے درست تناسب سے دکھائی نہیں دیتے۔
اس نقشے میں شمالی علاقوں، خصوصاً یورپ اور شمالی امریکا، اپنے اصل رقبے سے کہیں بڑے نظر آتے ہیں، جبکہ خط استوا کے قریب موجود افریقہ اور جنوبی امریکا نسبتاً چھوٹے دکھائی دیتے ہیں۔ ماہرین کے مطابق اس کی بڑی وجہ گول زمین کو کاغذ کے سیدھے نقشے پر دکھانے کا مسئلہ ہے۔
نئے ’مساوی زمین‘ نقشے کو 2018 میں ماہرین نقشہ سازی نے تیار کیا تھا۔ اس کا مقصد براعظموں کے رقبے کو زیادہ درست تناسب سے دکھانا ہے تاکہ دنیا کے مختلف خطوں کے بارے میں لوگوں کا تصور زیادہ حقیقت کے قریب ہو۔
یہ بھی پڑھیں:افریقی یونین نے ’نقشہ صحیح کرو‘ مہم کیوں شروع کی؟
قرارداد ٹوگو نے پیش کی تھی۔ ٹوگو کے وزیر خارجہ رابرٹ ڈوسی نے کہا کہ نقشے صرف جغرافیہ نہیں دکھاتے بلکہ تعلیم اور لوگوں کے تصورات پر بھی اثر انداز ہوتے ہیں۔
تاہم امریکا نے قرارداد پر تنقید کرتے ہوئے کہا کہ اقوام متحدہ کو نقشوں کے بجائے دنیا کے حقیقی مسائل پر توجہ دینی چاہیے۔ فرانس نے بھی قرارداد کی حمایت کرتے ہوئے اعلان کیا ہے کہ وہ روایتی مرکیٹر نقشے کو ترک کرکے نئے نقشے کے استعمال کی طرف جائے گا۔
