بھارتی شہر بنگلورو میں سڑک کے ایک گڑھے نے خاتون کو شدید زخمی کردیا، جس کے بعد اسے 5 روز اسپتال میں رہنا پڑا اور علاج پر تقریباً 2 لاکھ بھارتی روپے خرچ ہوگئے۔
این ڈی ٹی وی کے مطابق نجی شعبے میں کام کرنے والی ایشانی کھنہ 20 اگست کو وائٹ فیلڈ-ورتھور روڈ پر اسکوٹر پر دفتر جارہی تھیں۔ نیکسس مال کے قریب بارش کے دوران انہیں سڑک پر موجود ایک گڑھا نظر نہ آیا اور اسکوٹر اچانک گڑھے میں جا گرا۔
ایشانی نے بتایا کہ حادثے کے وقت بارش تیز تھی اور وہ احتیاط سے گاڑی چلا رہی تھیں، تاہم ایک گڑھا ان کی نظر سے اوجھل رہا۔ اسکوٹر گڑھے میں جانے کے بعد وہ اچھل کر سڑک پر جا گریں اور اسکوٹر بھی ان کے اوپر آ گرا۔
Bengaluru Pothole Horror
I want the civic authorities to urgently fix Bengaluru’s Varthur roads. I’m still recovering from an ankle injury caused by a pothole, and the stretch remains unchanged despite years of complaints: @Aishani_Khanna speaks to @anchoramitaw pic.twitter.com/KipWKvteMG
— TIMES NOW (@TimesNow) September 5, 2026
حادثے میں ان کے بائیں ٹخنے پر گہرے زخم آئے اور ہڈی کو شدید نقصان پہنچا۔ انہیں فوری طور پر اسپتال منتقل کیا گیا، جہاں ان کی پلاسٹک سرجری کی گئی اور وہ 5 دن تک زیر علاج رہیں۔
ایشانی کے مطابق اسپتال سے فارغ ہونے کے بعد انہیں ایک لاکھ 97 ہزار بھارتی روپے کا بل ادا کرنا پڑا، جبکہ زخم مکمل طور پر ٹھیک نہ ہونے کی صورت میں انہیں ایک اور آپریشن بھی کرانا پڑ سکتا ہے۔
انہوں نے سوشل میڈیا پر اپنی کہانی شیئر کرتے ہوئے متعلقہ حکام سے سڑکیں فوری طور پر ٹھیک کرنے کا مطالبہ کیا۔ ان کا کہنا تھا کہ یہ حادثہ کسی کے ساتھ بھی پیش آسکتا ہے اور خراب سڑکیں شہریوں کے لیے مسلسل خطرہ بنی ہوئی ہیں۔
یہ بھی پڑھیں:بنگلورو کے ڈے کیئر سینٹر میں بچوں پر مبینہ تشدد، واشنگ مشین میں بٹھانے اور باتھ روم میں بند کرنے کا انکشاف
این ڈی ٹی وی سے گفتگو میں ایشانی نے کہا کہ حادثے نے انہیں جسمانی تکلیف کے ساتھ ذہنی دباؤ اور مالی مشکلات سے بھی دوچار کردیا۔ ان کے مطابق وہ گزشتہ 30 برس سے بنگلورو میں رہ رہی ہیں اور انہوں نے شہر کی سڑکوں کی صورتحال کو وقت کے ساتھ خراب ہوتے دیکھا ہے۔
بنگلورو، جسے بھارت کا ٹیکنالوجی مرکز اور ’سلیکن ویلی‘ بھی کہا جاتا ہے، میں ٹوٹی پھوٹی اور گڑھوں سے بھری سڑکیں شہریوں اور حکام کے لیے ایک بڑا مسئلہ بنی ہوئی ہیں۔
