پاکستان کے کرکٹرز محمد رضوان اور امام الحق لازمی فٹنس ٹیسٹ نہ کرانے کے باعث صدر ٹرافی گریڈ ون میں شرکت نہیں کرسکیں گے۔
میڈیا رپورٹس کے مطابق محمد رضوان اور امام الحق نے اپنی متعلقہ محکمانہ ٹیموں کو فٹنس ٹیسٹ کی رپورٹس جمع نہیں کرائیں، جس کے باعث پاکستان کرکٹ بورڈ کے قواعد کے تحت دونوں کرکٹرز فرسٹ کلاس کرکٹ میں حصہ لینے کے اہل نہیں ہیں۔
یہ بھی پڑھیں: موبائل فون ڈیٹا کی تحقیقات، کرکٹرز امام الحق اور محمد رضوان سائبر کرائم ایجنسی میں پیش
پاکستان کرکٹ بورڈ نے محکمانہ ٹیموں کے لیے کھلاڑیوں کے فٹنس ٹیسٹ کرانا اور فرسٹ کلاس مقابلوں میں شرکت کی اجازت سے قبل ان کی رپورٹس جمع کرانا لازمی قرار دے رکھا ہے۔
سوئی ناردرن گیس پائپ لائنز لمیٹڈ، جس کی نمائندگی محمد رضوان کرتے ہیں، اور آئل اینڈ گیس ڈیولپمنٹ کمپنی لمیٹڈ، جس کی جانب سے امام الحق کھیلتے ہیں، دونوں کے پاس ان کھلاڑیوں کی فٹنس رپورٹس موجود نہیں ہیں۔
امام الحق کو او جی ڈی سی ایل کا کپتان مقرر کیا گیا تھا، جبکہ محمد رضوان کو سوئی ناردرن گیس پائپ لائنز لمیٹڈ کا نائب کپتان مقرر کیا گیا ہے۔ شان مسعود ٹیم کی قیادت کریں گے۔
یہ بھی پڑھیں:ٹیم کی ناکامی پر سب جواب دیں گے، امام الحق کی انجری کی بھی تحقیقات ہوں گی : عاقب جاوید
صدر ٹرافی گریڈ ون پاکستان کے 2026-27 کے ڈومیسٹک کرکٹ سیزن کا آغاز ہوگی، جس میں 8 محکمانہ ٹیمیں حصہ لیں گی۔
ٹورنامنٹ میں فائنل سے قبل ایک ہی لیگ مرحلے میں 28 چار روزہ میچز کھیلے جائیں گے، جبکہ فائنل 28 اکتوبر سے شروع ہوگا۔
افتتاحی مرحلہ 12 سے 15 ستمبر تک کھیلا جائے گا، جس میں غنی گلاس کا مقابلہ کے آر ایل، ایم آئی ٹی سلوشنز کا کنگز مین اکیڈمی، پی ٹی وی کا او جی ڈی سی ایل جبکہ اسٹیٹ بینک آف پاکستان کا سوئی ناردرن گیس پائپ لائنز لمیٹڈ سے مقابلہ ہوگا۔
یہ بھی پڑھیں: انگلینڈ سے شکست پر پی سی بی کا ایکشن : قومی ٹیسٹ اسکواڈ میں بڑی تبدیلیاں، کوچز اور 7 کھلاڑی فارغ
دوسری جانب محمد رضوان اور امام الحق سے قومی سائبر کرائم انویسٹی گیشن ایجنسی بھی پوچھ گچھ کررہی ہے۔ دونوں کرکٹرز کے موبائل فونز سے حاصل ہونے والے ڈیٹا سے متعلق تحقیقات جاری ہیں۔
رپورٹس میں بتایا گیا ہے کہ پاکستان کرکٹ بورڈ نے دونوں کھلاڑیوں کے موبائل فون اپنی تحویل میں لینے کے بعد متعلقہ حکام کے حوالے کردیے تھے۔
