بھارتی ریاست اتر پردیش میں بھارتیہ جنتا پارٹی (بی جے پی) کی حکومت والے ضلع بجنور میں مسلمان سرکاری اسکول کے ایک استاد کو فائرنگ کرکے شہید کر دیا گیا۔
رپورٹ کے مطابق ساو پوری گاؤں میں ایک پرائمری اسکول کے گیٹ کے قریب مسلح شخص نے استاد نوشاد احمد پر فائرنگ کی اور موٹر سائیکل پر فرار ہو گیا۔
حملہ آور کی شناخت گورو راٹھی کے نام سے کی گئی ہے۔ فائرنگ کے نتیجے میں 2 گولیاں نوشاد احمد کے سینے میں لگیں، جبکہ ایک گولی اسکول کی دیوار سے جا لگی۔
شدید زخمی استاد کو فوری طور پر اسپتال منتقل کیا گیا، جہاں ڈاکٹروں نے ان کی موت کی تصدیق کردی۔
بتایا گیا ہے کہ نوشاد احمد اسکول کے قریب اس وقت حملے کا نشانہ بنے جب وہ گھر واپس جا رہے تھے۔
واقعے کی اصل وجہ تاحال سامنے نہیں آسکی، تاہم قتل کے بعد سماجی رابطوں کی ویب سائٹس پر فرقہ وارانہ دشمنی اور مسلمانوں کے خلاف مبینہ تعصب کے ممکنہ کردار کے حوالے سے سوالات اٹھائے جا رہے ہیں۔
