جماعت اسلامی پاکستان کے امیر انجینئر حافظ نعیم الرحمان نے کہا ہے کہ 20 ستمبر کو میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) میں شرکت کرنے والے طلبہ کے لیے آمدورفت میں کوئی رکاوٹ پیدا نہیں کی جائے گی۔ انہوں نے کہا کہ جماعت اسلامی نے کوئی راستہ بند نہیں کیا، حکومت کی جانب سے سڑکوں پر رکاوٹیں کھڑی کی جا رہی ہیں۔
ایم ڈی کیٹ اور جماعت اسلامی کے 20 ستمبر کو اسلام آباد میں شیڈول احتجاجی مارچ کے ایک ہی روز ہونے پر امیدواروں میں پیدا ہونے والی تشویش دور کرتے ہوئے حافظ نعیم الرحمان نے کہا کہ طلبہ کو امتحانی مراکز تک پہنچنے کے لیے مکمل آزادی حاصل ہوگی اور تمام راستے کھلے رہیں گے۔
یہ بھی پڑھیے پیٹرولیم لیوی کے خلاف جماعت اسلامی کا سپر لانگ مارچ، شیڈول جاری
جماعت اسلامی کی مہنگائی اور بھاری پیٹرولیم لیوی کے خلاف جاری مہم کا ذکر کرتے ہوئے انہوں نے کہا کہ عوام کی بڑی تعداد اس تحریک کی حمایت کر رہی ہے، جبکہ متعدد خواتین نے تحریک کی حمایت کے لیے اپنے زیورات بھی عطیہ کیے ہیں۔
حافظ نعیم الرحمان نے ممکنہ حکومتی کریک ڈاؤن کی مذمت کرتے ہوئے کہا کہ پرامن احتجاج میں خلل ڈالنا، کارکنوں کو گرفتار کرنا اور ان پر حملے کرنا ناقابل قبول ہے۔ ان کا کہنا تھا کہ اگر حکومت نے کوئی منفی کارروائی کی تو جماعت اسلامی کے کارکن اس کا سامنا کرنے کے لیے تیار ہیں۔
جماعت اسلامی کے امیر نے سوال اٹھایا کہ آئل مارکیٹنگ کمپنیوں کو منافع کے بڑھائے گئے مارجن کیوں دیے جا رہے ہیں۔ انہوں نے پیٹرولیم لیوی اور ’آئی پی پیز مافیا‘ کے خاتمے کا فوری مطالبہ کرتے ہوئے دعویٰ کیا کہ عوامی مشکلات کے حل کے لیے کسی دوسری سیاسی جماعت کے پاس حقیقی منصوبہ موجود نہیں۔
یہ بھی پڑھیں:فیول ریلیف: وفاقی وزرا کی جماعت اسلامی کے وفد کو بریفنگ، لیاقت بلوچ نے حکومتی اعلامیہ مسترد کردیا
انہوں نے پیشگوئی کی کہ اسلام آباد میں ہونے والا مارچ ملک کی تاریخ کا سب سے بڑا مارچ ہوگا۔
حافظ نعیم الرحمان نے مکہ مکرمہ اور مدینہ منورہ پر کسی بھی قسم کے حملے کی شدید مذمت کرتے ہوئے حکومت پر زور دیا کہ جنگ کے خاتمے کے لیے تمام سفارتی کوششیں بروئے کار لائی جائیں۔
