وزیر خزانہ سینیٹر محمد اورنگزیب سے آئی ایف سی کے پاکستان، افغانستان، کرغز جمہوریہ، تاجکستان اور ترکمانستان کے ڈائریکٹر سائمن اینڈریوز نے ملاقات کی، جس میں پاکستان میں نجی شعبے کی ترقی، سرمایہ کاری کے فروغ اور مالی سہولیات تک رسائی بہتر بنانے کے لیے آئی ایف سی کی جاری اور ممکنہ معاونت پر تبادلۂ خیال کیا گیا۔ آئی ایف سی پاکستان کی پرنسپل کنٹری آفیسر ناز خان بھی ملاقات میں موجود تھیں۔
مزید پڑھیں:وزیر خزانہ محمد اورنگزیب کی بوئنگ گلوبل کے صدر سے ملاقات، پی آئی اے بیڑے کی جدیدکاری پر گفتگو
وزیر خزانہ نے آئی ایف سی کی پاکستان کے ساتھ مسلسل شراکت داری کو سراہتے ہوئے کہا کہ کاروباری افراد، چھوٹے اور درمیانے درجے کے کاروبار، زراعت، سستی رہائش اور سرکاری و نجی شعبے کی شراکت داری نجی سرمایہ کاری بڑھانے کے اہم شعبے ہیں۔ انہوں نے کہا کہ حکومت بہتر معاشی استحکام اور سرمایہ کاروں کے بڑھتے اعتماد کو زیادہ سرمایہ کاری، سرمائے کی تشکیل اور نجی شعبے کی قیادت میں پائیدار معاشی ترقی میں تبدیل کرنے پر توجہ دے رہی ہے۔
Federal Minister for Finance and Revenue, Senator Muhammad Aurangzeb, meeting with IFC Director, Mr. Simon Andrews, at the Finance Division today.
@IFC @IFC_org @AmirSaeedAbbasi https://t.co/hsgIKzBCwC— Media Talk (@mediatalk922) October 6, 2026
ملاقات میں آئی ایف سی کی جانب سے پاکستان میں نئے کاروبار اور اسٹارٹ اپس کے فروغ کے لیے نئے فنڈ کے قیام پر پیش رفت سے وزیر خزانہ کو آگاہ کیا گیا۔ سستی رہائش کے شعبے میں تعمیراتی منصوبوں کی مالی معاونت کے ذریعے گھروں کی فراہمی بڑھانے کے امکانات پر بھی گفتگو ہوئی۔
زرعی شعبے میں آئی ایف سی کے ایگری کنیکٹ اقدام کے تحت تعاون پر تبادلۂ خیال کیا گیا۔ زرعی اجناس کے محفوظ ذخیرے کے لیے بہتر سہولیات اور الیکٹرانک ویئر ہاؤس رسیدوں کو ضمانت کے طور پر استعمال کرتے ہوئے کسانوں اور زرعی شعبے کے لیے نجی قرضوں اور سرمایہ کاری تک رسائی بڑھانے کے امکانات کا جائزہ لیا گیا۔ وزیر خزانہ نے زرعی شعبے میں رکاوٹیں دور کرکے کسانوں اور قرض دینے والے اداروں کے لیے مالی سہولیات کو آسان بنانے کی ضرورت پر زور دیا۔
ملاقات میں سرکاری و نجی شعبے کی شراکت داری کے تحت پانی اور بجلی کے شعبوں میں جاری کام بھی زیر بحث آیا۔ آئی ایف سی نے صوبائی حکومتوں کے ساتھ پانی کے معیار اور محفوظ فراہمی بہتر بنانے اور بجلی کی تقسیم کار کمپنیوں میں میٹرنگ نظام کو جدید بنانے کے اقدامات سے آگاہ کیا۔ نجی شعبے کی شراکت سے خدمات بہتر بنانے، نقصانات کم کرنے اور بنیادی ڈھانچے میں سرمایہ کاری بڑھانے کے امکانات کا بھی جائزہ لیا گیا۔
وزیر خزانہ اور آئی ایف سی حکام نے مقامی کرنسی میں قرضوں اور مالی معاونت کے مواقع بڑھانے اور نجی شعبے کے منصوبوں کے لیے طویل مدتی مالی وسائل کی فراہمی بہتر بنانے پر بھی گفتگو کی۔ محمد اورنگزیب نے کہا کہ پیداواری سرمایہ کاری کے لیے ملکی وسائل کے ساتھ بین الاقوامی ترقیاتی اداروں کی مالی معاونت سے فائدہ اٹھانا اہم ہے۔
مزید پڑھیں:وزیر خزانہ محمد اورنگزیب پاکستان کے پہلے پانڈا بانڈ کے اجرا کے لیے چین روانہ
انہوں نے کہا کہ چھوٹے اور درمیانے درجے کے کاروبار، کاروباری افراد، زراعت اور ہاؤسنگ کے لیے طویل مدتی اور قابل استطاعت مالی سہولیات تک بہتر رسائی سے نجی سرمایہ کاری، کاروباری توسیع اور پیداواری سرگرمیوں کو فروغ ملے گا۔ فریقین نے نجی شعبے کی مالی معاونت، سرمایہ کاری اور بنیادی ڈھانچے کی ترقی میں تعاون مزید مضبوط بنانے کے عزم کا اعادہ کیا۔
