گلگت بلتستان کے گورنر سید مہدی شاہ اور وزیراعلیٰ امجد حسین نے خیبر پختونخوا میں آئینی ایمرجنسی کے نفاذ اور ریاستی رٹ بحال کرنے کے اقدام کا خیرمقدم کیا ہے۔
گورنر ہاؤس گلگت بلتستان سے جاری بیان کے مطابق سید مہدی شاہ نے کہا کہ خیبر پختونخوا میں آئینی ایمرجنسی کا فیصلہ مشکل ضرور تھا، تاہم صوبے کو بدانتظامی، کرپشن اور سیاسی انتشار سے بچانے کے لیے یہ ناگزیر ہو چکا تھا۔
انہوں نے کہا کہ گزشتہ چند سال کے دوران خیبر پختونخوا کو بدترین طرز حکمرانی کا سامنا کرنا پڑا اور صوبہ ترقی کے بجائے احتجاج اور افراتفری کی سیاست کی نذر ہوگیا۔
یہ بھی پڑھیں:اسلام آباد مارچ سے گورنر راج تک: سہیل آفریدی نے خود کو بند گلی میں کیسے دھکیلا؟
گورنر گلگت بلتستان کا کہنا تھا کہ خیبر پختونخوا کے عوام امن، روزگار اور ترقی چاہتے ہیں، انتشار نہیں۔ انہیں امید ہے کہ اس آئینی اقدام کے بعد صوبے میں میرٹ بحال ہوگا، کرپشن کا خاتمہ ممکن ہوگا اور ترقی کا نیا دور شروع ہوگا۔
دوسری جانب وزیراعلیٰ گلگت بلتستان امجد حسین نے اپنے بیان میں پاکستان تحریک انصاف کو تنقید کا نشانہ بناتے ہوئے کہا کہ پیپلز پارٹی کی قیادت نے خیبر پختونخوا میں سیاسی حل تلاش کرنے کی مخلصانہ کوششیں کیں، تاہم پی ٹی آئی ذمہ دارانہ کردار ادا کرنے میں ناکام رہی۔
انہوں نے کہا کہ علاقائی خطرات اور سرحد پار سے بڑھتی ہوئی دہشتگردی کے تناظر میں وفاقی حکومت کے پاس ریاست کی حاکمیت اور رٹ قائم کرنے کے سوا کوئی راستہ باقی نہیں رہا تھا۔
