بدھ کے روز انٹربینک مارکیٹ میں امریکی ڈالر کے مقابلے میں پاکستانی روپے کی قدر میں معمولی بہتری کا سلسلہ جاری رہا اور روپیہ ایک پیسہ مضبوط ہوا۔
یہ بھی پڑھیں: ’ایک پیسہ بھی بہت ہے‘: امریکی ڈالر کے مقابلے میں پاکستانی روپے کی قدر میں اضافہ جاری
دن کے اختتام پر مقامی کرنسی 276.87 روپے سے بہتر ہو کر 276.86 روپے پر بند ہوئی۔ یاد رہے کہ منگل کے روز روپیہ 276.87 پر بند ہوا تھا۔
امریکی ڈالر اور دیگر کرنسیاں
عالمی مارکیٹ میں امریکی ڈالر پر بدھ کے روز بھی دباؤ برقرار رہا، کیونکہ ٹریژری کی شرح منافع اور خام تیل کی قیمتوں میں کمی کے باعث ڈالر کی کشش میں کمی آئی۔
6 اہم عالمی کرنسیوں کے مقابلے میں ڈالر کی قدر کا اندازہ لگانے والا ڈالر انڈیکس 0.2 فیصد کمی کے بعد 101.78 پر مستحکم رہا۔
مزید پڑھیے: خراماں خراماں: روپے کی قدر مسلسل مضبوطی کی سمت گامزن، جانیے یہ سلسلہ کب سے جاری ہے؟
آسٹریلوی ڈالر 3 ہفتوں کی بلند ترین سطح کے قریب 0.7013 ڈالر پر رہا۔ آسٹریلین سینٹرل بینک کے ڈپٹی گورنر اینڈریا ہاؤزر نے افراط زر کے بڑھتے خدشات پر اگلے ماہ شرحِ سود میں مزید اضافے کا اشارہ دیا ہے۔
چینی یوآن مضبوط برآمدات اور عالمی سطح پر ڈالر کی کمزوری کے باعث 4 سال کی بلند ترین سطح 6.6765 فی ڈالر کو چھونے کے بعد معمولی کمی کے ساتھ 6.6791 پر ٹریڈ ہوا۔
عالمی سطح پر تیل کی قیمتیں
کرنسی کے استحکام کے لیے اہم سمجھی جانے والی خام تیل کی قیمتوں میں بدھ کے روز 2 ڈالر سے زائد کا بڑا اضافہ دیکھا گیا۔
برینٹ خام تیل کے سودے 2.06 ڈالر (1.9 فیصد) اضافے کے ساتھ 110.85 ڈالر فی بیرل پر پہنچ گئے۔
مزید پڑھیں: روپے کی قدر میں پیشرفت جاری، ڈالر اب کتنے کا ہوگیا؟
امریکی ویسٹ ٹیکساس انٹرمیڈیٹ خام تیل کی قیمت 2.13 ڈالر (2.2 فیصد) اضافے کے ساتھ 99.95 ڈالر فی بیرل ہو گئی۔
