سابق وزیر اعلیٰ پنجاب چوہدری پرویز الٰہی کے خلاف ایف آئی اے میں دائر مقدمے میں ان کے گن مین محمد زمان کے موبائل سے اہم آڈیوز برآمد ہوئی ہیں۔
ایف آئی اے کے مطابق محمد زمان کے موبائل فون سے اہم شواہد حاصل کر لیے گئے ہیں۔ آڈیوز میں سنا جاسکتا ہے کہ پرویز الٰہی اور محمد زمان رقم کے لین دین پر بات کررہے ہیں۔
ایف آئی اے نے بتایا ہے کہ محمد زمان کی پرویز الٰہی کی مبینہ اہلیہ سارہ انور کے گھر پر 71 دفعہ موجودگی تکنیکی سہولتوں سے ثابت ہوگئی۔ اس کے علاوہ پرویز الٰہی کی جانب سے محمد زمان سے 154 مرتبہ اور اپنی مبینہ اہلیہ سارہ انور سے 683 مرتبہ بات کرنا بھی ثابت ہو گیا ہے۔
یاد رہے کہ پرویز الٰہی کے گن مین محمد زمان کو ایف آئی اے نے چند روز پہلے گرفتار کیا تھا۔ محمد زمان کو اس سے قبل اسلام آباد پولیس نے سرکاری گاڑی میں شراب کی ترسیل کرتے ہوئے گرفتار کیا تھا اس کی بھی جیو فینسنگ کروا لی گئی ہے۔
یہ بھی واضح رہے کہ پرویز الٰہی اس وقت منی لانڈرنگ کیس میں 14 روزہ جوڈیشل ریمانڈ پر ہیں۔
