امریکی ریاست فلوریڈا کے سفاری پارک میں نایاب سفید گینڈے کے 40 ویں بچے کی پیدائش ہوئی ہے، جس پر انتہائی خوشی کا اظہار کیا جا رہا ہے۔
فلوریڈا کے ڈرائیو تھرو سفاری پارک کے حکام نے اعلان کیا ہے کہ یہاں ان کے پارک میں نایاب سفید گینڈے کی نسل کے 40 ویں بچے کی پیدائش ہوئی ہے۔ جنوبی نسل کے سفید گینڈے کی پیدائش 19 اگست کو ہوئی۔
سفاری پارک کے حکام نے سوشل میڈیا پلیٹ فارم ’فیس بک‘ پر ایک پوسٹ میں کہا کہ نئے پیدا ہونے والے گینڈے کا نام ’الیسا‘ رکھا گیا ہے جو اس مرکز میں پیدا ہونے والا 40 واں گینڈا ہے۔
پوسٹ میں کہا گیا ہے کہ نایاب نسل کے سفید گینڈے کی پیدائش نہ صرف ایک اہم سنگ میل ہے بلکہ جنوبی سفید گینڈوں کی طویل المدتی بقا اور تحفظ میں بھی مزید مدد ملے گی۔
حکام کا کہنا ہے کہ ’الیسا‘ اور اس کی ماں ’انا‘ کو فی الحال سفاری پارک میں ہی رکھا جائے گا۔
