میلبورن ٹیسٹ کے لیے ٹیم کا اعلان: سرفراز احمد ڈراپ، محمد رضوان اِن

پاکستان اور آسٹریلیا کے درمیان میلبورن میں کل 26 دسمبر سے کھیلے جانے والے دوسرے ٹیسٹ میچ کے لیے 12 رکنی پاکستانی ٹیم کا اعلان کردیا گیا ہے۔

پاکستان کرکٹ بورڈ (پی سی بی) کی جانب سے میلبورن ٹیسٹ کے لیے اعلان کردہ 12 کھلاڑیوں میں سرفرازاحمد اور فہیم اشرف کو ڈراپ جبکہ محمد رضوان، میرحمزہ اور حسن علی کو ٹیم میں شامل کر لیا گیا ہے۔

کپتان شان مسعود، امام الحق، عبداللہ شفیق، بابراعظم اور سعود شکیل شامل ہیں، محمدرضوان، سلمان علی آغا، شاہین شاہ آفریدی، حسن علی، میرحمزہ، عامر جمال اور ساجد خان بھی 12 رکنی ٹیم میں شامل ہیں، فائنل الیون کا اعلان کل کیا جائے گا۔

آسٹریلیا کو 3 ٹیسٹ میچز کی سیریز میں ایک صفر سے برتری حاصل ہے۔ آسٹریلیا نے پرتھ میں کھیلے گئے پہلے ٹیسٹ میچ میں پاکستان کو 360 رنز سے شکست دے دی تھی۔

میچ کے چوتھے دن آسٹریلیا نے 5 کھلاڑی آؤٹ پر 233 رنز پر اننگز ڈیکلیئر کر دی تھی اور پاکستان کو 450 رنز کا ہدف دیا تھا، تاہم پاکستانی بلے باز آسٹریلین بولرز کا مقابلہ نہیں کرسکے تھے اور ساری ٹیم 89 رنز پر ڈھیر ہوگئی تھی۔

میلبورن کے میدان میں پاکستان نے 1964 سے 2016 تک 10 ٹیسٹ میچ کھیلے، جن میں سے 2 میں اس نے کامیابی حاصل کی اور 6 میں شکست ہوئی۔ پاکستان نے میلبورن میں آخری ٹیسٹ میچ 1981 میں جیتا تھا۔