پاکستان آرمی کے ایک ریٹائرڈ سینیئر افسر نے ملک میں 8 فروری کو ہونے والے عام انتخابات کو کالعدم قرار دینے کے لیے سپریم کورٹ سے رجوع کیا ہے۔
بریگیڈیئر ریٹائرڈ علی خان نے سپریم کورٹ میں اپنی دائر کردہ درخواست میں مؤقف اپنایا کہ عام انتخابات میں جمہوری اصولوں کی نفی کی گئی اور پاکستان تحریک انصاف سمیت تمام سیاسی جماعتوں کو لیول پلیئنگ فیلڈ فراہم نہیں کی گئی، بانی پی ٹی آئی پر جھوٹے الزامات لگا کر انہیں پابند سلاسل کیا گیا اور پی ٹی آئی سے انتخابی نشان چھین کر جمہوری عمل کو نقصان پہنچایا گیا۔
Related Posts
درخواست میں کہا گیا کہ عام انتخابات میں بڑے پیمانے پر مبینہ دھاندلی کی گئی جبکہ پی ٹی آئی امیدواروں کے لیے انتخابی مہم میں کئی مشکلات اور رکاوٹیں کھڑی کی گئیں اور اسے ووٹرز سے رابطہ قائم کرنے کے بنیادی حق سے محروم رکھا گیا، الیکشن کے روز ووٹرز کے اچھے ٹرن آؤٹ کے باوجود ریٹرننگ افسروں نے پولنگ نتائج جاری کرنے میں تاخیر کی جس سے انتخابات کی شفافیت پر سنجیدہ تحفظات پیدا ہوئے۔
بریگیڈیئر ریٹائرڈ علی خان نے اپنی درخواست میں مزید کہا کہ بڑے پیمانے پر دھاندلی اور انتخابی نتائج میں تبدیلی کے ذریعے متعدد پی ٹی آئی رہنماؤں کو ہرانے سے متعلق انکشافات نے انتخابی نتائج کی درستگی پر سوال کھڑے کیے ہیں۔
درخواست گزار نے سپریم کورٹ سے استدعا کی ہے کہ سپریم کورٹ انتخابات کو کالعدم قرار دے کر اپنی نگرانی میں 30 دن کے اندر نئے انتخابات کا حکم دے۔ درخواست میں عدالت سے یہ استدعا بھی کی گئی ہے کہ 8 فروری کے انتخابات کے تحت حکومت سازی روکی جائے۔
واضح رہے کہ پاکستان تحریک انصاف ملک میں عام انتخابات میں مبینہ دھاندلی کے خلاف آج پہلے ہی ایک درخواست سپریم کورٹ میں جمع کرا چکی ہے۔ پی ٹی آئی نے اپنی درخواست میں سپریم کورٹ سے استدعا کی ہے کہ وہ مداخلت کرکے عوامی مینڈیٹ کو بلڈوز اور عوام کے مسترد شدہ اقلیّتی گروہ کو ملک پر مسلط کرنے کے مذموم منصوبے کی راہ روکے۔
