وزیراعظم پاکستان شہباز شریف نے کہا ہے کہ پاکستان تیزی سے معاشی استحکام کی جانب گامزن ہے، اور ملک میں پبلک پرائیویٹ پارٹنرشپ پر انحصار بڑھا رہا ہے۔
وزیراعظم شہباز شریف سے استنبول گرینڈ ایئرپورٹ (آئی جی اے) کے وفد نے لاہور میں ملاقات کی۔
وفد میں آئی جی اے بورڈ ممبر محمت کالیو نجو، چیف ایئرپورٹ آپریٹنگ افسر اسماعیل پولات اور چیف کارپوریٹ افیئرز افسر ترگئے یمان شامل تھے۔
مزید پڑھیں
شہباز شریف نے کہاکہ ہم دنیا بھر کے کاروباری افراد اور سرمایہ کاروں کو خوش آمدید کہتے ہیں، جبکہ خصوصاً برادر ملک ترکیہ سے سرمایہ کاری اور شراکت داری کو فروغ دینے کے خواہاں ہیں۔
انہوں نے کہاکہ ہم اسلام آباد، کراچی اور لاہور کے ہوائی اڈوں پر مسافروں کے لیے دستیاب سہولیات کو بڑھانے اور مزید بہتر کرنے کے لیے اقدامات اٹھا رہے ہیں۔
وزیراعظم نے کہاکہ پاکستان سب سے پہلے پبلک پرائیویٹ پارٹنرشپ کے تحت اسلام آباد انٹرنیشنل ایئرپورٹ کے کچھ کمرشل آپریشنز کو آؤٹ سورس کرنے کی پیشکش کر رہا ہے۔
شہباز شریف نے کہاکہ ایئرپورٹ آؤٹ سورسنگ کے تمام مراحل میں شفافیت ہماری اولین ترجیح ہو گی۔ پاکستان میں شہری ترقی کے شعبے میں سرمایہ کاری اور شراکت داری کی بڑی گنجائش ہے۔
پاکستان اور ترکیہ کے تعلقات مضبوط ہورہے ہیں
انہوں نے کہاکہ پاکستان اور ترکیہ دو برادر ممالک ہیں جن کے باہمی تعلقات وقت کے ساتھ مزید مضبوط ہو رہے ہیں۔ دونوں ممالک کے درمیان کاروباری شراکت داری بڑھانے کا یہی مناسب وقت ہے۔
وفد نے پاکستان میں سرمایہ کاری اور شراکت داری کے مواقع میں گہری دلچسپی ظاہر کی۔
ملاقات میں ترکیہ کے لاہور میں تعینات قونصل جنرل درمش باستوع اور ترکیہ سفارتی عملے کے دیگر ارکان بھی موجود تھے۔ جبکہ وزیردفاع و ہوا بازی خواجہ آصف، وفاقی وزیر اقتصادی امور احد خان چیمہ اور متعلقہ اعلیٰ سرکاری افسران بھی ملاقات میں شریک ہوئے۔
