پنجاب حکومت کا سولر پینل اسکیم سے متعلق پائلٹ پروجیکٹ شروع کرنے کا فیصلہ

وزیر اعلیٰ پنجاب مریم نواز شریف نے روشن پنجاب پروگرام کے تحت صوبہ بھر میں 50 ہزار گھرانوں کو ون کے وی سولر سسٹم فراہم کرنے کی اصولی منظوری کے ساتھ فوری طور پر اس ضمن میں پائلٹ پروجیکٹ شرو ع کرنے کی ہدایت کی ہے۔

وزیر اعلیٰ مریم نواز شریف کی زیر صدارت ایک خصوصی اجلاس میں ایک کلو واٹ کے سولر سسٹم کی فراہمی سے متعلق تکنیکی امور پر بریفنگ دی گئی، وزیر اعلیٰ نے پہلے مرحلے پر  مختلف گھروں میں ون کے وی سولر سسٹم لگا کر افادیت کا جائزہ لینے کا حکم دیدیا۔

اس منصوبے کے تحت سولر سسٹم کے لیے  100یونٹ تک بجلی خرچ کرنے والے پروٹیکٹڈ صارفین اہل ہوں گے، واضح رہے کہ ون کے وی سسٹم میں 2 سولر پلٹیں، بیٹری، انورٹر اور تاریں فراہم کی جائیں گی، ون کے وی سولر سسٹم سے پنکھے اور لائٹوں سمیت چھوٹی موٹر وغیرہ چلائی جا سکے گی۔

وزیراعلی پنجاب نے جدید ترین ٹیکنالوجی کے حامل سولر سسٹم نصب کرنے کی ہدایت کرتے ہوئے بہترین کوالٹی کی سولر پلیٹس، انورٹر، بیٹریاں اور دیگرسامان استعمال کرنے کی ضرورت پر بھی زور دیا۔

مریم نواز شریف کے مطابق روشن پنجاب پروگرام کا مقصدغریب آدمی کو مہنگی بجلی سے نجات دلانا ہے، لیتھیئم آئرن بیٹری کے ذریعے 16گھنٹے تک بیک اپ حاصل کیا جا سکے گا، گھریلو صارفین کے لیے سولر سسٹم کا دائرہ کار بتدریج بڑھایا جائے گا۔

سینئر صوبائی وزیر مریم اورنگزیب، وزیر اطلاعات عظمیٰ زاہد بخاری، سینیٹر پرویز رشید، ایم پی اے ثانیہ عاشق، چیف سیکریٹری، چیئرمین پی اینڈ ڈی، سیکرٹریز توانائی، خزانہ، چیف ایگزیکٹو آفیسر پی پی ڈی سی ایل، مینیجنگ ڈائریکٹر پی پی ڈی بی سمیت دیگر حکام نے اجلاس میں شرکت کی۔