حکومت سندھ نے ٹیکس چوروں کے نام اخبارات میں شائع اور بینک اکاؤنٹس منجمند کرنے کا فیصلہ کر لیا ہے۔
جمعہ کو سندھ کے سینیئر وزیر شرجیل انعام میمن کی زیر صدارت اعلیٰ سطح کا اجلاس ہوا جس میں ایکسائز ٹیکسیشن و نارکوٹکس کنٹرول کے سیکریٹری سلیم راجپوت، ڈی جی اورنگزیب پنہور، ڈائریکٹرز اور دیگر افسران شریک ہوئے۔
مزید پڑھیں
اجلاس سے خطاب کرتے ہوئے سینیئر وزیر شرجیل میمن نے کہا کہ ٹیکس چور ملکی خوشحالی کے دشمن ہیں، ان کو کسی بھی صورت بخشا نہیں جائے گا، ٹیکس چوروں کے نام اخبارات میں شایع کیے جائیں گے اور ان کے اکاؤنٹس منجمند کرنے کے لیے بھی اقدامات کریں گے۔
سندھ کے سینیئر وزیر شرجیل انعام میمن نے صوبے بھر میں منشیات فروشوں کے خلاف جاری کریک ڈاؤن کو سراہا۔ کریک ڈاؤن کے دوران بہترین کارکردگی دکھانے والے افسران کی تعریف کی اور انہیں کریک ڈاؤن میں مزید تیزی لانے کی ہدایات کی۔
شرجیل انعام میمن نے مزید کہا کہ منشیات فروش ملک و قوم کے مستقبل کے دشمن ہیں، ان کے ساتھ کوئی نرمی نہیں برتی جائے گی۔ زیرو ٹالرنس پالیسی کے تحت صوبے بھر میں منشیات فروشوں کے خلاف کارروائیاں جاری رکھی جائیں۔
شرجیل انعام میمن نے مزید کہا کہ منشیات فروشوں اور ٹیکس چوروں کے خلاف کارروائیوں کے لیے پولیس کے قابل افسران اور جوانوں کو ڈیپوٹیشن پر محکمہ ایکسائز میں لایا جائے گا۔
انہوں نے مزید کہا کہ ابتدائی طور کراچی اور حیدرآباد میں پولیس افسران دیپوٹیشن پر محکمہ ایکسائز میں لائے جائیں گے، متعلقہ ادارے ہمہ وقت تعاون کریں گے۔
شرجیل انعام میمن نے مزید کہا کو منشیات فروشوں کی پراسیکیوشن اور انویسٹیگیشن مضبوط کی جائے، اجلاس میں بہترین کارکردگی والے افسران اور مخبروں کو انعامات دینے کا بھی فیصلہ کیا گیا۔
اجلاس میں گاڑیوں کی رجسٹریشن اور منتقلی بائیومیٹرک کے تحت کرنے کی تجویز دی گئی اور محکمہ ایکسائز سے متعلقہ تمام اسٹیک ہولڈرز کی شکایات کے ازالے کے لیے اقدامات کا فیصلہ کیا گیا۔
