گلوکار سونونگم کے 76 سالہ والد نے اپنے سابق ڈرائیور کے خلاف 72 لاکھ روپے چوری کرنے کے الزام میں کیس درج کرایا ہے۔ چوری کا واقعہ سونونگم کے ممبئی میں واقع گھر میں پیش آیا۔
گلوکار کے والد اگم کمار نگم‘ اوشی واڑہ اندھیری ویسٹ میں ونڈسر بلڈنگ میں رہتے ہیں۔ چوری کا واقعہ گزشتہ شب پیش آیا۔ سونونگم کی چھوٹی بہن نکیتا نے اوشی واڑہ پولیس اسٹیشن میں شکایت درج کرائی۔
شکایت کے مطابق اگم کمار نگم کے پاس قریباً 8 ماہ سے ایک ڈرائیور ریحان کام کر رہا تھا جس کی کارکردگی اطمینان بخش نہ ہونے پر حال ہی میں اسے نکال دیا گیا تھا۔ اتوار کی دوپہر اگم کمار لنچ کے لیے ورسووا میں اپنی بیٹی نکیتا کے گھر گئے تھے اور کچھ دیر بعد واپس لوٹ آئے تھے۔
انہوں نے شام میں اپنی بیٹی کو فون کیا اور اسے بتایا کہ لکڑی کی الماری میں ڈیجیٹل لاکر میں رکھے ہوئے 40 لاکھ روپے غائب ہیں۔ دوسرے دن اگم کمار اپنے بیٹے کے گھر ویزا سے متعلق کسی کام سے گئے تھے اور شام میں واپس آئے۔ انہوں نے دیکھا کہ لاکر سے مزید 32 لاکھ روپے غائب ہیں۔
لاکر کو کوئی نقصان بھی نہیں پہنچا تھا۔ اگم کمار اور نکیتا نے اپنی سوسائٹی کا سی سی ٹی وی فوٹیج چیک کیا جس میں دیکھا گیا کہ ان کا سابق ڈرائیور ریحان دونوں دن ایک بیگ کے ساتھ ان کے فلیٹ کی طرف جا رہا ہے۔
شکایت کے مطابق اگم کمار کو شبہ ہے کہ ریحان نقلی چابی کی مدد سے ان کے گھر میں داخل ہوا ہوگا اور اس نے بیڈروم میں ڈیجیٹل لاکر سے 72 لاکھ روپے چوری کر لیے۔ نکیتا کی شکایت پر اوشی واڑہ پولیس نے تعزیرات ہند کی دفعہ 380،454 اور 457 کے تحت ایک ایف آئی آر درج کرلی۔مزید تحقیقات جاری ہیں۔
