ڈونلڈ ٹرمپ ایران کے ساتھ معمولی نہیں وسیع تر معاہدہ کرنا چاہتے ہیں، جے ڈی وینس

امریکی نائب صدر جے ڈی وینس کا کہنا ہے کہ صدر ڈونلڈ ٹرمپ ایران کے ساتھ محدود نہیں بلکہ ایک وسیع تر اور جامع معاہدے کے لیے کوشاں ہیں۔

یہ بھی پڑھیں: اسلام آباد مذاکرات کے بعد بھی پاکستان کے ذریعے امریکا سے رابطے جاری ہیں، ایران

جارجیا کے ایک پروگرام میں خطاب کرتے ہوئے جے ڈی وینس نے امریکا و ایران کے درمیان جاری مذاکرات کو ایک وسیع حکمت عملی کا حصہ قرار دیا جو ایک نازک جنگ بندی پر مبنی ہے جو تقریباً ایک ہفتے سے جاری ہے۔

انہوں نے کہا کہ یہ خوش آئند بات ہے کہ امریکا و ایران کے درمیان جنگ بندی 6 یا 7 دن سے برقرار ہے۔

وینس نے کہا کہ ٹرمپ کا مقصد چھوٹا موٹا معاہدہ کرنا نہیں ہے بلکہ وہ ایک جامع اور عظیم معاہدہ چاہتے ہیں۔ انہوں نے مزید کہا کہ ٹرمپ جو ایران کو پیشکش کر رہے ہیں وہ بہت سادہ ہے اگر آپ ایک نارمل ملک کی طرح سلوک کریں گے تو ہم بھی آپ کے ساتھ اقتصادی طور پر ایک نارمل ملک کی طرح سلوک کریں گے۔

یاد رہے کہ امریکا اور ایران کے درمیان اسلام آباد میں ہونے والی بات چیت کے دوران کوئی معاہدہ نہیں ہو سکا تھا۔ وہ مذاکرات 28 فروری کو شروع ہونے والے امریکا و اسرائیل کے ایران کے خلاف آپریشن کو ختم کرنے کی وسیع تر کوششوں کا حصہ تھے جس میں ایران اور لبنان میں 3,300 سے زیادہ افراد شہید ہوئے۔ اس کے بعد ایک عارضی (2 ہفتوں کی) جنگ بندی کی گئی۔

مزید پڑھیے: ایران جنگ نہیں، مذاکرات چاہتا ہے: صدر پزشکیان کا دوٹوک مؤقف

وینس نے کہا کہ اس وقت تک کوئی حتمی معاہدہ نہیں ہو سکا کیونکہ ٹرمپ انتظامیہ نیوکلیئر شرائط پر سخت مؤقف اختیار کیے ہوئے ہے۔

انہوں نے مزید کہا کہ اس معاہدے کے نہ ہونے کی وجہ یہ ہے کہ صدر واقعی ایسا معاہدہ چاہتے ہیں جس میں ایران کے پاس جوہری ہتھیار نہ ہوں۔

واضح رہے کہ امریکا اور اسرائیل ایران پر جوہری اور میزائل پروگراموں کی نگرانی کا الزام عائد کرتے ہیں جو خطے میں اتحادیوں کے لیے خطرہ بن سکتے ہیں جب کہ ایران اپنے جوہری پروگرام کو پرامن قرار دیتا ہے اور جوہری ہتھیاروں کے حصول کی تردید کرتا ہے۔

جے ڈی وینس نے مزید کہا کہ مذاکرات جاری رہیں گے اور انہوں نے اس بات پر خوش امیدی کا اظہار کیا کہ کامیاب معاہدہ عالمی سطح پر مثبت اثرات مرتب کرے گا۔

انہوں نے کہا کہ ہم مذاکرات جاری رکھیں گے اور اس کو حقیقت بنانے کی کوشش کریں گے کیونکہ یہ دنیا کے لیے، ہمارے ملک کے لیے، اور سب کے لیے بہت اچھا ہوگا۔ انہوں نے مزید کہا کہ ہم اس کے لیے لڑتے رہیں گے۔

ٹرمپ نے منگل کو اس بات پر خوشی کا اظہار کیا تھا کہ امریکا اور ایران کے درمیان براہ راست بات چیت دوبارہ شروع ہو سکتی ہے اور یہ بات چیت پاکستان میں اگلے 2 دنوں میں دوبارہ شروع ہو سکتی ہے۔۔

وینس نے ایران اور امریکا کے درمیان بہت زیادہ عدم اعتماد کا ذکر کرتے ہوئے کہا کہ آپ اس مسئلے کو راتوں رات حل نہیں کر سکتے لیکن میں سمجھتا ہوں کہ ہم جن لوگوں کے ساتھ بات کر رہے ہیں وہ معاہدہ کرنا چاہتے ہیںب اور مجھے معلوم ہے کہ امریکی صدر نے ہمیں کہا کہ ہم اچھی نیت سے مذاکرات کریں یہی ہم نے کیا ہے اور یہی ہم کرتے رہیں گے۔

جے ڈی وینس کی فیلڈ مارشل سید عاصم منیر کی تعریف

دریں اثنا امریکی نائب صدر جے ڈی وینس نے وزیراعظم شہباز شریف اور چیف آف آرمی اسٹاف فیلڈ مارشل سید عاصم منیر کی تعریف کی جنہوں نے امریکا اور ایران کے درمیان مذاکرات میں اہم کردار ادا کیا۔

فاکس نیوز کو دیے گئے ایک انٹرویو میں انہوں نے دونوں رہنماؤں کو غیر معمولی میزبان اور ریاستی حکمت عملی کے حامل قرار دیا اور کہا کہ مجھے فیلڈ مارشل آصف منیر اور پاکستان کے وزیراعظم شہباز شریف کو بہت سراہنا چاہیے۔

یہ بھی پڑھیے: ایران امریکا مذاکرات کا دوسرا دور، جے ڈی وینس، وٹکاف اور جیرڈ کشنر حصہ لیں گے، سی این این

ان کا کہنا تھا کہ دونوں غیر معمولی میزبان تھے اور انہوں نے ایران اور امریکا کے درمیان طویل عرصے بعد ہونے والے مذاکرات میں مدد فراہم کرنے میں حقیقی ریاستی حکمت عملی دکھائی۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں