فٹبال کی عالمی تنظیم فیفا نے اپنے صدر جیانی انفینٹینو کو عہدے سے ہٹانے کی مبینہ مہم اور ادارے کو کمزور کرنے کی کوششوں پر سخت ردعمل دیتے ہوئے الزامات کو بے بنیاد اور من گھڑت قرار دے دیا۔
بی بی سی کے مطابق فیفا کا بیان ’ڈیلی ٹیلی گراف‘ کی ایک رپورٹ کے بعد سامنے آیا، جس میں دعویٰ کیا گیا تھا کہ یوئیفا کے سابق جنرل سیکریٹری کی حیثیت سے انفینٹینو کی ایک مبینہ دوست کو ادارے سے رخصت ہوتے وقت رقم ادا کی گئی تھی۔
یہ بھی پڑھیں: مراکش کو 2030 ورلڈ کپ فائنل کی میزبانی کی مبینہ پیشکش، فیفا صدر جیانی انفینٹینو پر تنقید
فیفا کے ترجمان نے ان الزامات کو مسترد کرتے ہوئے کہا کہ قیاس آرائیوں اور الزامات کو حقائق کے طور پر پیش نہیں کیا جانا چاہیے۔
جیانی انفینٹینو کو ’فیفا فارورڈ انٹرپرائز‘ کی تجویز کے بعد یوئیفا اور یورپی فٹبال ایسوسی ایشنز کی جانب سے شدید دباؤ کا سامنا ہے۔ اس منصوبے کے تحت تجارتی اور ٹکٹوں کے حقوق سنبھالنے کے لیے ایک نئی کمپنی قائم کرکے اس کے 21 فیصد حصص ایک نجی سرمایہ کاری کمپنی کو فروخت کرنے کی تجویز دی گئی تھی۔
یہ بھی پڑھیں: فیفا صدر جیانی انفینٹینو کی مشکلات بڑھ گئیں، ورلڈ کپ نجی سرمایہ کاروں کو دینے کے منصوبے پر بغاوت کا سامنا
یوئیفا نے جیانی انفینٹینو پر عدم اعتماد کا اظہار کیا ہے، جبکہ ناروے کی فٹبال فیڈریشن کی صدر لیس کلیوینس نے بھی ان سے مستعفی ہونے کا مطالبہ کیا ہے۔
فیفا نے اپنے بیان میں واضح کیا کہ جیانی انفینٹینو تمام 211 رکن فٹبال ایسوسی ایشنز کے جمہوری مینڈیٹ کے تحت منتخب ہوئے ہیں۔ تنظیم کا کہنا ہے کہ جو عناصر جمہوری عمل کے ذریعے کامیاب نہیں ہوسکتے، وہ غلط معلومات اور الزام تراشی کا سہارا لے رہے ہیں۔
یہ بھی پڑھیں: ’نفرت کے بیج نہ بوئیں‘: ورلڈ کپ 2026 پر تنقید کرنے والوں کو فیفا صدر کا دوٹوک جواب
یورپ کی شدید مخالفت کے باوجود جیانی انفینٹینو کو افریقی فٹبال کنفیڈریشن کے تمام 54 رکن ممالک، جنوبی امریکی کنفیڈریشن اور میکسیکن فٹبال فیڈریشن کی مکمل حمایت حاصل ہے۔
فیفا نے کہا کہ تنظیم آئینی اور قانونی جانچ پڑتال کا خیرمقدم کرتی ہے، تاہم حقائق کو توڑ مروڑ کر پیش کرنے اور ادارے کی ساکھ کو نقصان پہنچانے والی کسی بھی مہم کا بھرپور مقابلہ کیا جائے گا۔
