فرانس میں سائبر حملے کے ذریعے سیکڑوں سپر مارکیٹوں کے ریفریجریشن سسٹم کو نشانہ بنایا گیا جس کے نتیجے میں فریج اور فریزر غیر معمولی طور پر گرم ہوگئے اور بڑی مقدار میں تازہ اور منجمد خوراک خراب ہونے کا خدشہ پیدا ہوگیا جبکہ بعض اسٹورز میں آلات سے دھواں اٹھنے کی اطلاعات بھی سامنے آئیں۔
میڈیا رپورٹس کے مطابق فرانس کی معروف سپر مارکیٹ چینز کیریفور، مونوپری، انٹرمارشے اور کوآپریٹو یو سمیت متعدد اسٹورز کے ریفریجریٹرز کا درجۂ حرارت رات کے وقت 50 ڈگری سینٹی گریڈ (122 ڈگری فارن ہائیٹ) تک پہنچ گیا جس سے خوراک محفوظ رکھنے کے نظام کو شدید نقصان پہنچا۔
یہ بھی پڑھیں: ریفریجریٹر سے پہلے پانی ٹھنڈا کرنے کی سعودی صحرائی ایجاد کیا تھی؟
کوآپریٹو یو کے چیف ایگزیکٹو ڈومینیک شیلشر نے تصدیق کی کہ سائبر حملوں کے باعث متعدد اسٹورز میں ریفریجریشن کے نظام متاثر ہوئے۔ ان کا کہنا تھا کہ تازہ اشیائے خورونوش کو محفوظ رکھنے اور عوام کی غذائی ضروریات پوری کرنے کے لیے استعمال ہونے والے آلات کو نشانہ بنانا انتہائی سنگین اور ناقابل قبول اقدام ہے۔
سائبر سکیورٹی ماہر فیلکس ایمے کے مطابق اس حملے کے اثرات صرف فرانس تک محدود نہیں رہے بلکہ اسپین، پرتگال، پولینڈ، جرمنی اور بیلجیئم سمیت دیگر یورپی ممالک میں بھی ایسے واقعات سامنے آئے۔
یہ بھی پڑھیں: ’دھنیا فریج میں اگتا رہتا ہے؟‘، ندا یاسر کے بیان پر صارفین کی ٹرولنگ
یورپی کمشنر برائے زراعت و خوراک کرسٹوف ہینسن نے حملے کی مذمت کرتے ہوئے کہا کہ غذائی تحفظ پر ہر سطح پر مزید توجہ دینے کی ضرورت ہے کیونکہ خوراک کو بطور ہتھیار استعمال کرنے کا خطرہ حقیقت بن چکا ہے۔ سپر مارکیٹ گروپ لیس موسکیٹیرز کے مطابق سائبر حملے سے اس کے تقریباً 180 اسٹورز متاثر ہوئے جبکہ مالی نقصان کئی ملین یورو تک پہنچنے کا خدشہ ہے۔
کمپنی کے مطابق اس کے ایک سروس فراہم کرنے والے ادارے کو نشانہ بنایا گیا تھا جو بعض اسٹورز کے ریفریجریشن سسٹم کا انتظام سنبھالتا ہے۔ حملے کے بعد متعدد مقامات پر تازہ اور منجمد اشیائے خورونوش رکھنے والے ڈسپلے فریج اور فریزر بند ہوگئے۔
یہ بھی پڑھیں: بلیک میلنگ سے تنگ عاشق نے محبوبہ کو قتل کرکے فریج میں چھپا دیا
ترجمان نے بتایا کہ صارفین کی حفاظت یقینی بنانے کے لیے انٹرمارشے اور نیٹو نے متاثرہ اشیائے خورونوش کو اسٹورز سے ہٹانے اور تلف کرنے کے اقدامات کیے۔ بعض اسٹورز میں آلات زیادہ گرم ہونے سے دھواں اٹھا تاہم کمپنی کے مطابق آگ لگنے کے کسی واقعے کی تصدیق نہیں ہوئی۔ کمپنی اب عدالتی طور پر مقرر کردہ بیلف اور انشورنس ماہرین کی رپورٹوں کی منتظر ہے جن کی مدد سے نقصانات کی حتمی مالیت کا تعین کیا جائے گا۔
دوسری جانب اسٹاپ اینڈ شاپ کی مالک کمپنی اہولڈ ڈیلاہیز نے بھی اپنے نیٹ ورک میں سکیورٹی کے مسئلے کی تصدیق کرتے ہوئے بتایا کہ احتیاطی طور پر بعض نظام بند کردیے گئے ہیں تاہم اس کے اسٹورز کھلے ہیں۔
یہ بھی پڑھیں: ریچھوں کا کیلیفورنیا کے کیبن پر دھاوا، فریج لوٹ لیا
یہ واقعہ ایسے وقت میں پیش آیا ہے جب دنیا بھر میں سائبر حملوں اور آن لائن جرائم میں اضافے پر تشویش بڑھ رہی ہے۔ ماہرین کے مطابق مصنوعی ذہانت (اے آئی) سائبر حملوں کو زیادہ تیز اور وسیع پیمانے پر انجام دینے میں مدد دے سکتی ہے۔
گزشتہ ہفتے برطانوی آن لائن فیشن کمپنی ای سوس کو بھی سائبر سکیورٹی کی خلاف ورزی کا سامنا کرنا پڑا جس کے نتیجے میں بعض صارفین کی ذاتی معلومات افشا ہوئیں۔
یہ بھی پڑھیں: ریفریجریٹر کو دیوار سے کتنا قریب رکھنا چاہیے؟
اسی طرح برطانیہ میں ایک چھوٹا پاور پلانٹ بھی جولائی میں سائبر حملے کے بعد چار روز تک بند رہا جبکہ اس حملے میں ایران سے ممکنہ تعلق کا شبہ ظاہر کیا گیا تھا۔
انٹرپول کے چیف انفارمیشن سکیورٹی آفیسر بیورن آر واٹن نے کہا کہ مصنوعی ذہانت کے ذریعے بیک وقت متعدد اہداف کو نشانہ بنانا ممکن ہو رہا ہے جس سے سائبر حملوں کی رفتار اور دائرۂ کار بڑھ رہا ہے۔ ان کے مطابق یہ ٹیکنالوجی سائبر خطرات میں ایک تدریجی تبدیلی لا رہی ہے، نہ کہ کوئی اچانک انقلاب۔
