امریکی صدر ڈونلڈ ٹرمپ نے ایران کے خلاف جوہری ہتھیار استعمال کرنے یا زمینی فوج بھیجنے سے صاف انکار کر دیا ہے، تاہم امریکی میڈیا رپورٹس کے مطابق واشنگٹن نے ایران کی جوہری اور توانائی تنصیبات پر حملوں کے لیے غیر جوہری ’مادر آف آل بمز‘ بم کے آپشنز تیار کر لیے ہیں۔
امریکی صدر ڈونلڈ ٹرمپ نے نیوز میکس کو دیے گئے انٹرویو میں واضح کیا ہے کہ وہ ایران کے خلاف جوہری ہتھیار استعمال نہیں کریں گے کیونکہ امریکا کو اس کی کوئی ضرورت نہیں ہے۔
یہ بھی پڑھیں:امریکی صدر ڈونلڈ ٹرمپ کی صحت کے پوشیدہ مسائل: ڈاکٹروں نے کیا انکشاف کیا؟
جمعرات کی شام نشر ہونے والے اس انٹرویو میں ٹرمپ کا کہنا تھا کہ وہ جوہری ہتھیار استعمال نہیں کریں گے کیونکہ امریکا دنیا کی سب سے بڑی جوہری طاقت ہے۔
’مادر آف آل بمز‘ اور جنگی آپشنز
نیوز میکس کی جانب سے ٹرمپ سے اس رپورٹ کے بارے میں پوچھا گیا جس میں واشنگٹن کی طرف سے جی بی یو 43 بی موآب یعنی ‘مادر آف آل بمز‘ کے استعمال پر غور کیے جانے کا دعویٰ کیا گیا تھا۔
ٹرمپ نے اس خبر کی براہ راست تصدیق یا تردید کیے بغیر کہا کہ یہ بم جوہری نہیں ہے بلکہ یہ ایک انتہائی بڑا بم ہے جو ایک چھوٹے جوہری بم جیسا محسوس ہوتا ہے مگر قطعی طور پر جوہری نہیں ہے۔
واضح رہے کہ موآب امریکی اسلحہ خانے کا سب سے بڑا غیر جوہری بم ہے جسے سن 2017 میں افغانستان میں داعش کے عسکریت پسندوں کے خلاف جنگ میں استعمال کیا گیا تھا۔
زمینی فوج بھیجنے کا کوئی ارادہ نہیں
جب ٹرمپ سے انٹرویو کے دوران یہ سوال کیا گیا کہ کیا وہ میدان جنگ میں امریکی فوج بھیجیں گے تو انہوں نے دوٹوک انداز میں جواب دیا کہ وہ اس کا کوئی امکان نہیں دیکھتے۔
مزید پڑھیں:ایران کے ساتھ جنگ جلد ختم ہونے کا امکان ہے، تیل کی قیمتیں بھی کم ہوں گی، ڈونلڈ ٹرمپ
سی این این کی جاری کردہ رپورٹ کے مطابق امریکی فوج نے ایران کی توانائی کی تنصیبات اور جوہری سائیٹس کو نشانہ بنانے کے لیے نئے اسٹرائیک پلانز تیار کر لیے ہیں۔
یہ ممکنہ حملے اس صورت میں کیے جا سکتے ہیں اگر صدر ٹرمپ مڈٹرم انتخابات سے پہلے یا بعد میں جنگی کارروائیاں دوبارہ شروع کرنے کا حکم صادر کریں۔
وائٹ ہاؤس نے سی این بی سی کی اس حوالے سے تبصرے کی درخواست پر فوری طور پر کوئی ردعمل ظاہر نہیں کیا۔ یاد رہے کہ ٹرمپ نے 8 اکتوبر کو بیان دیا تھا کہ وہ 3 نومبر کے مڈٹرم انتخابات سے قبل فوجی حملے دوبارہ شروع کرنے کا حکم نہیں دیں گے۔
آبنائے ہرمز میں کشیدگی اور بڑھتے ہوئے خطرات
آبنائے ہرمز میں پیش آنے والے پے در پے حملوں کے بعد اس انتہائی اہم آبی گزرگاہ سے گزرنے والی تجارتی شپنگ کو شدید ترین خطرات لاحق ہو چکے ہیں۔
برطانیہ کی میری ٹائم ٹریڈ آپریشنز نے تصدیق کی ہے کہ آبنائے ہرمز میں خطرہ بدستور انتہائی شدید ہے، جہاں سنگاپور میں رجسٹرڈ کنٹینر شپ جی ایف ایس پرائیڈ کو ایک نامعلوم پروجیکٹائل لگنے کے بعد آگ لگ گئی اور وہ ڈوب گیا۔
یو کے ایم ٹی او کے مطابق اس حساس آبی گزرگاہ میں ارادی طور پر کی جانے والی دشمنانہ کارروائی انتہائی ممکن ہے اور ادارے نے 11 اکتوبر سے لے کر اب تک یہاں کل 8 حملے ریکارڈ کیے ہیں۔
