نائب وزیراعظم اور وزیر خارجہ اسحاق ڈار 19 اور 20 اکتوبر کو تاجکستان کے دارالحکومت دوشنبے میں شنگھائی تعاون تنظیم (ایس سی او) کے سربراہانِ حکومت کونسل کے اجلاس میں پاکستانی وفد کی قیادت کریں گے۔
مزید پڑھیں:پاکستان میں 2027ء کے شنگھائی تعاون تنظیم کے سربراہی اجلاس کی تیاریوں کا جائزہ
ترجمان دفتر خارجہ کے مطابق اسحاق ڈار تاجکستان کے وزیراعظم قاہر رسول زادہ کی دعوت پر اجلاس میں شرکت کریں گے۔ چین، روس، بیلاروس، قازقستان، کرغزستان، تاجکستان اور ازبکستان کے وزرائے اعظم، جبکہ ایران کے نائب صدر اور بھارت کے وزیر خارجہ بھی اجلاس میں شریک ہوں گے۔
دفتر خارجہ کے مطابق ایس سی او سربراہانِ حکومت کونسل تنظیم کا دوسرا اعلیٰ ترین فیصلہ ساز ادارہ ہے۔ اجلاس میں معیشت، تجارت، مالیات، رابطہ کاری اور سماجی و اقتصادی تعاون سمیت مختلف امور پر تبادلہ خیال کیا جائے گا۔
تنظیم کے بجٹ اور دیگر اہم معاملات سے متعلق فیصلے بھی متوقع ہیں، جبکہ اجلاس کے اختتام پر مشترکہ اعلامیہ اور اہم بیانات جاری کیے جائیں گے۔
مزید پڑھیں:پاکستان کی قیادت میں شنگھائی تعاون تنظیم مزید مضبوط ہوگی، چین
دورے کے دوران نائب وزیراعظم اسحاق ڈار تاجکستان کے صدر اور وزیراعظم سے ملاقاتیں کریں گے۔ وہ اجلاس کے موقع پر ایس سی او کے رکن ممالک کے ہم منصبوں سے دوطرفہ ملاقاتیں بھی کریں گے۔
ترجمان دفتر خارجہ کے مطابق پاکستان تنظیم کے پلیٹ فارم سے علاقائی تعاون، تجارت اور رابطہ کاری کے فروغ کے لیے اپنا کردار ادا کرے گا۔
