کرنسی میں استحکام، زرمبادلہ کے ذخائر بڑھ رہے ہیں: وفاقی وزیر خزانہ

وفاقی وزیر خزانہ محمد اورنگزیب نے کہا ہے کہ بہترین معاشی پالیسیوں کی وجہ سے ملک میں استحکام آیا ہے۔ زرمبادلہ کے ذخائر میں بتدریج اضافہ ہو رہا ہے، ہم بیرونی سرمایہ کاری کے فروغ کے لیے کوشاں ہیں، 10 ماہ سے پاکستان کی کرنسی میں بھی استحکام آیا ہے۔

اسلام آباد میں پاک سعودیہ سرمایہ کاری فورم 2024 کی تقریب سے خطاب کرتے ہوئے وفاقی وزیر خزانہ کا کہنا تھا کہ پاکستان اب عمل درآمد کی پالیسی پر عمل پیرا ہے، اس مقصد کے لیے ٹیکس بیس کو وسیع اور توانائی کے مسائل کو حل کرنا پڑے گا، یہ ریفارم ایجنڈے کا دوسرا اہم حصہ ہے جبکہ تیسرا سرکاری اداروں میں اصلاحات ہے۔ معاشی استحکام کے لیے پالیسیوں کا تسلسل ضروری ہے۔

محمد اورنگزیب نے کہا کہ حکومت کا کام بزنس کرنا نہیں، نجکاری کا ایجنڈا تیزی سے مکمل کریں گے، امید ہے کہ جون کے آخر یا جولائی تک کے آخری مرحلے میں ہوں گے، نجی سیکٹر کو آگے آنا ہوگا۔

وفاقی وزیر کا کہنا تھا کہ 24ویں آئی ایم ایف پروگرام میں جا رہے ہیں، اس بات کو یقینی بنانے کے لیے کہ یہ ہمارا آخری پروگرام ہو، ہمارے پاس روڈ ٹو مارکیٹ کا واضح منظر ہونا ضروری ہے، ایکسپورٹ میں ترقی اور براہ راست غیرملکی سرمایہ کاری ضروری ہے۔