ڈائریکٹر سعودی پبلک سیکیورٹی لیفٹیننٹ جنرل محمد البسامی نے حج کے حوالے سے کانفرنس کے دوران اعلان کیا ہے کہ پچھلے چند دنوں میں 140 جعلی حج کمپئین پکڑی گئیں۔ البسامی نے وضاحت کی کہ جعلی کمپئین میں ملوث تمام افراد کو مملکت بھر میں گرفتار کرلیا گیا ہے۔
انہوں نے کہاکہ وزیر داخلہ نے اس سال کے حج کے لیے مختپف منصوبوں کی منظوری دی ہے، جس میں سیکیورٹی کے پہلو، نظام کی حفاظت کا منصوبہ، ہجوم اور ٹریفک کی روانی کا منصوبہ اور ہنگامی حالات کے منصوبے شامل ہیں۔
مزید پڑھیں
انہوں نے مزید کہاکہ ہم نے اب تک 64 ہزار غیر قانونی طور پر حجاج کی منتقلی میں ملوث لوگوں کو گرفتار کیا ہے۔ ان گرفتار اشخاص کی سزا 50 ہزار ریال تک ہوسکتی ہے۔
حج کے قوانین اور تعلیمات کی خلاف ورزی کرنے والے 21 افراد کے خلاف انتظامی احکامات جاری
دریں اثنا سعودی وزارت داخلہ نے اعلان کیا ہے کہ حج کے قوانین اور تعلیمات کی خلاف ورزی کرنے والے 21 افراد کے خلاف انتظامی احکامات جاری کیے گئے ہیں جبکہ 61 افراد کو بغیر اجازت نامے کے حج کرنے پر گرفتار کیا گیا ہے۔
وزارت نے بتایا کہ مکہ مکرمہ میں داخل ہونے والے راستوں پر سیکیورٹی فورسز نے 21 افراد کو پکڑا جو کہ حج کے قوانین کی خلاف ورزی کررہے تھے۔ ان میں 8 غیر ملکی اور 13 سعودی شہری شامل ہیں، یہ کارروائی 7 جون 2024 کو عمل میں آئی۔
وزارت داخلہ کے مطابق ان افراد کے خلاف 15 دن کی قید کی سزا، 10 ہزار ریال کا جرمانہ اور خلاف ورزی کی تفصیلات عوامی سطح پر شائع کی جائیں گی۔
وزارت داخلہ نے بتایا کہ غیر ملکی افراد کو ملک سے بے دخل کر دیا جائے گا اور ان کے دوبارہ ملک میں داخل ہونے پر پابندی ہوگی، جبکہ نقل وحمل کے لیے استعمال ہونے والی 3 گاڑیاں ضبط کرلی جائیں گی۔
سعودی وزارت داخلہ نے تمام شہریوں اور غیر ملکیوں سے درخواست کی ہے کہ وہ حج کے نظام اور تعلیمات کی مکمل پابندی کریں تاکہ عازمینِ حج امن وسکون کے ساتھ اپنے مذہبی فرائض ادا کرسکیں۔
