ترجمان دفتر خارجہ نے کہا ہے کہ برادر اسلامی ملک بنگلہ دیش کے ساتھ روابط جاری رکھیں گے، دونوں ملکوں کے مابین باہمی تعلقات کے فروغ کے لیے پرعزم ہیں
دفتر خارجہ میں ہفتہ وار بریفنگ دیتے ہوئے ترجمان دفتر خارجہ ممتاز زہرا بلوچ کا کہنا تھا کہ پاکستانی ہائی کمشنر نے پرسوں خالدہ ضیا سے ملاقات کی ہے جس میں دوطرفہ تعلقات بہتر کرنے اور بڑھانے کے حوالے سےبات چیت کی گئی ہے۔
یہ بھی پڑھیں:پاک – بنگلہ دیش تعلقات میں غیر معمولی بہتری، ویزا میں آسانی، دہائیوں بعد چینی درآمد
پالیسی کے تحت ہم دیگر ممالک باہمی تعلقات پر تبصرہ نہیں کرتے، یہ میزبان ملک کی ذمہ داری ہے کہ وہ مہمان سفارت کاروں اور سفارتی عملے کے تحفظ کو یقینی بنائے۔
امریکی محکمہ خارجہ کے ترجمان کی جانب سے پاکستانی صحافی مطیع اللہ جان کے بارے میں ریمارکس پر تبصرہ کرتے ہوئے ترجمان دفتر خارجہ کا کہنا تھا کہ مطیع اللہ جان کو عدالتوں میں پیش کیا گیا، جو اپنے شہریوں کو ریلیف دینے کی صلاحیت رکھتی ہیں۔
مزید پڑھیں:غیرملکی سفارتکار پاکستان کے اندرونی معاملات پر تبصروں میں محتاط رہیں، ترجمان دفتر خارجہ
ترجمان کے مطابق پاکستان کل اقوام متحدہ کی منظور ہونے والی قرارداد کو خوش آئند قرار دیتا ہے، جس میں فلسطینی علاقوں سے اسرائیلی فوج کے انخلا اور فلسطینی ریاست کے قیام کی بات کی گئی ہے۔
ترجمان دفتر خارجہ کا کہنا تھا کہ پاکستان پرامن طریقے سے بات چیت کے ذریعے سے مسئلہ کشمیر حل کرنا چاہتا ہے لیکن بھارت کی جانب سے اس خواہش کا اظہار نظرنہیں آتا۔
مزید پڑھیں:پاکستان برآمدی کنٹرول کے سیاسی استعمال کو مسترد کرتا ہے، ترجمان دفتر خارجہ
’پاکستان مقبوضہ کشمیر میں کشمیری شہریوں سے بھارتی حکومت کی جانب سے جائیدادیں ہتھیانے کی مذمت کرتا ہے، پاکستان کشمیریوں کی سفارتی سیاسی اخلاقی امداد جاری رکھے گا۔‘
افغانستان میں عورتوں کی تعلیم اور نرسنگ کے شعبے پر طالبان حکومت کی جانب سے عائد پابندی پر تبصرہ کرتے ہوئے ترجمان کا کہنا تھا کہ تعلیم ہر مرد اور عورت کا حق ہے، اور اسلام عورتوں کو جائیداد کا حق بھی دیتا ہے۔
مزید پڑھیں:ٹی ٹی پی سمیت دیگر دہشتگرد گروہوں سے مذاکرات کا کوئی ارادہ نہیں، ترجمان دفتر خارجہ
سابق ریٹائرڈ فوجی افسروں کی بطور پاکستانی سفیر تعیناتی کی بابت پوچھے گئے سوال کا جواب دیتے ہوئے ممتاز زہرا بلوچ نے کہا کہ ان کے پاس بیرونی ممالک میں تعینات پاکستانی سفیروں کی فہرست نہیں، سفیر مقرر کرنا حکومت کا اختیار ہے۔ ’پاکستان دہشت گردی کے خلاف اپنی جنگ جاری رکھے گا اور اپنے لوگوں کو محفوظ بنانے کی کوششیں جاری رکھے گا۔‘
ترجمان دفتر خارجہ کا کہنا تھا کہ امریکا میں قید ڈاکٹرعافیہ صدیقی کے حوالے سے وزیراعظم کی جانب سے لکھے گئے خط کے بارے میں معلومات نہیں، پاکستان عافیہ صدیقی کے مقدمے کی پیروی کے لیے پر عزم ہے اور دفتر خارجہ اس سلسلے میں سہولت جاری رکھے گا۔
مزید پڑھیں:پاکستان کسی ملک کے خلاف فوجی اڈے دینے کا ارادہ نہیں رکھتا، ترجمان دفتر خارجہ
انہوں نے بتایا کہ وزیراعظم شہباز شریف نے 2 سے 3 دسمبر ریاض سعودی عرب کا دورہ کیا، انہوں نے ورلڈ بینک، فرانس، قازقستان اور دیگر ممالک کے اشتراک سے ون واٹر کانفرنس میں شرکت کی اور سائیڈ لائن پر سعودی ولی عہد محمد بن سلمان اور فرانسیسی صدر سے ملاقاتیں بھی کی ہیں۔
’اس ہفتے نائب وزیراعظم و وزیر خارجہ اسحاق ڈار نے مشہد میں ہونے والی ای سی او کانفرنس میں شرکت کی، سائیڈ لائن ملاقاتوں میں انہوں نے ایران کے وزیر خارجہ سمیت دیگر حکام سے ملاقاتیں کیں۔‘
مزید پڑھیں:بھارت کشمیری سیاسی جماعتوں پر عائد پابندی فوری ہٹائے، ترجمان دفتر خارجہ پاکستان
ترجمان کے مطابق وزیر توانائی نے روس کے دورے میں توانائی، تعلیم، صنعت سے متعلق 8 معاہدات پر دستخط کیے، وزیر توانائی کے دورہ روس میں دونوں ملکوں کے درمیان رابطوں سے متعلق مسائل پر بات کی گئی ہے۔
ترجمان دفتر خارجہ کے مطابق بھارت میں مذہبی مقامات پر حملے تشویش ناک ہیں، پچھلے کچھ برسوں کے دوران بھارت میں مساجد اور درگاہوں کو منظم طریقے سے نشانہ بنایا جا رہا ہے، بھارت کو مسلمانوں کی مذہبی آزادی، عزت آبرو کی حفاظت کو یقینی بنانا چاہیے۔
مزید پڑھیں:عالمی برادری پاکستان کے ساتھ مل کر غزہ میں جنگ بندی ممکن بنائے، ترجمان دفتر خارجہ
ترجمان نے بتایا کہ گزشتہ روز نائب وزیراعظم نے سفارتی کور سے ملاقات کی اور ان کو یقین دہانی کروائی کہ سفارت خانوں اور سفارتی عملے کی ہر صورت حفاظت یقینی بنائی جائے گی۔
’بیرون ممالک پاکستانی قیدیوں کے اعداد و شمار بدلتے رہتے ہیں، خلیجی ممالک میں قید پاکستانیوں کی وطن واپسی کے لیے اقدامات کیے جاتے ہیں۔‘
