نیٹ فلکس نے اپنی حکمت عملی میں ایک بڑی تبدیلی کرتے ہوئے اعلان کیا ہے کہ وہ فلم ساز گریٹا گیروِگ کی نئی فلم ‘نارنیا، دی میجیشنز نیفیو’ کو اگلے سال بڑے پیمانے پر سینما گھروں میں ریلیز کرے گا۔
نیٹ فلیکس کے مطابق یہ فلم اسٹریمنگ سروس پر آنے سے قبل کم از کم 45 دنوں تک خصوصی طور پر سینما گھروں کی زینت بنی رہے گی، جو نیٹ فلکس کی تاریخ میں پہلی بار ہورہا ہے۔
یہ بھی پڑھیں: نیٹ فلکس اور ‘کپل شرما شو’ پر کاپی رائٹ خلاف ورزی کا مقدمہ
گریٹا گیروِگ کی تحریر اور ہدایت کاری میں بننے والی یہ فلم سی ایس لیوس کی 1955 کی مشہور کتاب پر مبنی ہے جو نارنیا کے آغاز کی کہانی بیان کرتی ہے۔ طے شدہ پروگرام کے تحت یہ فلم 12 فروری کو بڑے پردے پر پیش کی جائے گی جبکہ اسے 2 اپریل سے نیٹ فلکس پر دیکھا جاسکے گا۔
نیٹ فلکس عموماً اپنی فلمیں صرف اپنی اسٹریمنگ سروس پر ہی جاری کرتا ہے، تاہم ماضی میں اکیڈمی ایوارڈز کی اہلیت کے لیے کچھ فلموں کو محدود وقت کے لیے سینماؤں میں دکھایا جاتا رہا ہے۔
یہ بھی پڑھیں: نیٹ فلکس اور وارنر برادرز کا معاہدہ کھٹائی میں، صدر ٹرمپ درمیان میں کودپڑے
کمپنی کا کہنا ہے کہ ‘نارنیا’ کی ہر نسل اور ہر خطے میں مقبولیت کو مدنظر رکھتے ہوئے اسے بڑے پیمانے پر تھیٹر میں ریلیز کرنے کا فیصلہ کیا گیا ہے۔
سینما مالکان نے اس فیصلے کا خیرمقدم کیا ہے، جس میں سینما یونائیٹڈ کے صدر مائیکل اولیری اور اے ایم سی انٹرٹینمنٹ کے چیئرمین ایڈم ایرون شامل ہیں، جنہوں نے اس اقدام کی بھرپور حمایت کا یقین دلایا ہے۔
خود گریٹا گیروِگ نے بھی نیٹ فلکس کے اس فیصلے کی تعریف کرتے ہوئے کہا ہے کہ وہ اس بات پر پرجوش ہیں کہ شائقین اس فلم کو سینما گھروں اور اسٹریمنگ پلیٹ فارم دونوں پر دیکھ سکیں گے۔
