وزیراعظم محمد شہباز شریف نے وزیراعلیٰ خیبر پختونخوا محمد سہیل آفریدی سے ٹیلیفونک رابطہ کر کے گزشتہ روز بنوں میں پولیس چوکی پر ہونے والے دہشت گرد حملے کی شدید مذمت کی ہے۔
وزیراعظم نے دہشت گردی کے واقعے میں قیمتی جانوں کے نقصان پر گہرے افسوس اور رنج کا اظہار کرتے ہوئے شہید ہونے والے پولیس اہلکاروں کے درجات کی بلندی کے لیے دعا کی اور ان کے اہل خانہ سے اظہارِ تعزیت کیا۔
یہ بھی پڑھیں:سیکیورٹی فوسز نے فتنہ الخوارج کے دہشتگردوں کی پاکستان میں داخل ہونے کی کوشش ناکام بنادی، طالبان چوکیاں تباہ
انہوں نے حملے میں زخمی ہونے والے افراد کی جلد صحت یابی کے لیے بھی دعا کی۔
وزیراعظم شہباز شریف نے اس موقع پر دہشتگردی کے مکمل خاتمے کے لیے وفاقی حکومت کے صوبائی حکومتوں کے ساتھ مل کر کام کرنے کے عزم کا اعادہ کرتے ہوئے کہا کہ دہشت گردی کے خلاف جنگ میں خیبر پختونخوا حکومت کو ہر ممکن معاونت فراہم کی جائے گی۔
وزیراعظم نے کہا کہ ملک سے ہر قسم کی دہشت گردی کے مکمل خاتمے کے لیے حکومت پُرعزم ہے اور اس ناسور کے خلاف تمام ادارے متحد ہیں۔
ٹیلیفونک گفتگو کے دوران وزیراعظم اور وزیراعلیٰ خیبر پختونخوا نے دہشت گردی کے خلاف نبرد آزما پاک افواج، سیکیورٹی فورسز اور پولیس کے کردار کو خراجِ تحسین بھی پیش کیا۔
