بھارت میں 24 جولائی کو ریلیز ہونے والی فلم ’دی انڈیا اسٹوری: سلو پوائزن اِن پروگریس‘ اپنی نمائش سے قبل ہی تنازع کا شکار ہوگئی ہے۔ زرعی کیمیکل (ایگرو کیمیکل) صنعت سے وابستہ تنظیموں نے فلم کے ٹیزر میں کیڑے مار ادویات، غذائی تحفظ اور کینسر سے متعلق کیے گئے دعووں پر اعتراض اٹھاتے ہوئے سنٹرل بورڈ آف فلم سرٹیفکیشن (CBFC) سے فلم کا تفصیلی جائزہ لینے کا مطالبہ کیا ہے۔
بھارتی میڈیا کے مطابق فلم میں اداکار شریاس تلپڑے اور کاجل اگروال مرکزی کردار ادا کر رہے ہیں۔ فلم کی کہانی خوراک میں کیمیائی مادوں کے استعمال، عوامی صحت اور غذائی تحفظ جیسے موضوعات کے گرد گھومتی ہے، جبکہ اس کا ٹیزر متعدد متنازع دعووں کی وجہ سے تنقید کی زد میں آ گیا ہے۔
یہ بھی پڑھیے بھارت سرکار دلجیت دو سانجھ کی فلم ’ستلج‘ سے کیوں خوفزدہ ہے؟
ایگرو کیم فیڈریشن آف انڈیا (ACFI)، جو اپنے دعوے کے مطابق ملک کی تقریباً 85 فیصد زرعی کیمیکل صنعت کی نمائندگی کرتی ہے، نے سی بی ایف سی کو خط لکھ کر مطالبہ کیا ہے کہ فلم کی منظوری سے قبل اس میں پیش کیے گئے اعداد و شمار اور دعووں کی سائنسی بنیاد کا جائزہ لیا جائے۔ تنظیم کے ڈائریکٹر جنرل کلیان گوسوامی کا کہنا ہے کہ ٹیزر میں پیش کی گئی معلومات ’گمراہ کن اور غیر مصدقہ‘ ہیں۔
واضح رہے کہ فلم کے ٹیزر میں دعویٰ کیا گیا ہے کہ بھارت میں خوراک کے ذریعے لاکھوں افراد کیڑے مار ادویات کے مضر اثرات سے متاثر ہو رہے ہیں۔ ٹیزر میں ’ہم نے خوراک نہیں بلکہ زہر اُگایا‘، ’50 ہزار میٹرک ٹن سے زائد کیڑے مار ادویات‘ اور ’20 کروڑ سے زائد افراد متاثر‘ جیسے جملے بھی شامل ہیں، جبکہ کیمیائی کاشتکاری کو کینسر کے بڑھتے ہوئے کیسز سے بھی جوڑا گیا ہے۔
یہ بھی پڑھیے بالی ووڈ فلم ’چوہان‘ پر ہنگامہ، مقبوضہ کشمیر میں پیلٹ گن متاثرین کا شدید ردِعمل
فلم کے ہدایت کار چیتن ڈی کے نے اعتراضات کو مسترد کرتے ہوئے کہا ہے کہ فلم کسی فرد یا صنعت کو نشانہ بنانے کے لیے نہیں بنائی گئی بلکہ یہ حقیقی واقعات اور دستیاب حقائق پر مبنی ہے۔ ان کے مطابق فلم کا مقصد صرف یہ اجاگر کرنا ہے کہ زرعی کیمیکلز کا ضرورت سے زیادہ استعمال انسانی صحت کے لیے نقصان دہ ثابت ہو سکتا ہے۔
یہ تنازع ایسے وقت میں سامنے آیا ہے جب بھارت میں زرعی کیمیکلز کے استعمال، خوراک کے معیار اور عوامی صحت کے حوالے سے بحث پہلے ہی جاری ہے، جبکہ فلم 24 جولائی کو سینما گھروں میں ریلیز کیے جانے کا شیڈول رکھتی ہے۔
